Di 23 di novèmber te ku 27 di novèmber 2025, Jurgen Nobel, sekretario di estado pa partisipashon i integrashon, lo bishitá Boneiru. E bishita di trabou ta enfoká riba e lei i regulashon nobo pa akohida di mucha, kondishonnan laboral i siguridat sosial. Riba e isla e sekretario di estado lo topa tambe ku gobernantenan di Sint Eustatius i Saba. Sekretario di estado Nobel ta e mandatario di gabinete ku ta responsabel pa maneho riba tereno di asuntunan sosial i empleo pa Boneiru, Sint Eustatius i Saba.
Sekretario di estado Nobel:
“Riba tereno di labor, siguridat sosial i akohida di mucha konhuntamente nos ta tumando pasonan grandi. A hisa suèldu mínimo, nos ta trahando riba un areglo di fakansi i un areglo di desempleo. Tambe nos ta trahando riba un areglo nobo, di manera ku Inspekshon di labor por hasi trabou di mantenshon na boka di trabou mas mihó. Pa akohida di mucha otro aña un lei ta drenta na vigor pa akohida sigur, pagabel i di bon kalidat. Ku plaser mi ta bin Boneiru pa mi mes mira i skucha kon maneho ta funshoná den práktika. Trabou mester paga, mester ta sigur i mayornan mester por hiba nan yunan un akohida bon i pagabel.”
Durante su bishita e sekretario di estado lo bishitá diferente akohida di mucha pa wak i diskutí kon ta preparando e lei di Akohida di Mucha BES nobo. E lei ta drenta promé di yanüari 2026 na vigor i su meta ta pa regla ku akohida di mucha ta sigur, di kalidat i pagabel.
E sekretario di estado lo tene tambe diferente kòmbersashon riba diferente tópiko riba tereno di labor, entrada i siguridat sosial ku Diálogo Sentral, Kámara di Komersio, ofisina di labor Plenchi di Trabou i organisashon di ayudo sosial Sentro Akseso Boneiru. Tambe e ta bishitá Inspekshon di Labor pa skucha kiko tin mester den práktika pa fortifiká mantenshon di lei di parti di inspekshon. Na e momentunan akí tin un trayekto andando pa modernisá regulashon pa kondishonnan laboral.
Riba su último dia di bishita e sekretario di estado lo topa ku gobernantenan di Sint Eustatius i Saba. Finalmente e sekretario di estado lo asistí na e konferensia di fin di aña di e Kordinadó Nashonal kontra Diskriminashon i Rasismo (NCDR). E konferensia akí ta enfoká riba Hulanda Karibense i e diferensianan ku Hulanda Oropeo. Pobresa, muchanan ku ta lanta den pobresa i siguridat di eksistensia ta temanan importante al respekto.