Ya pa fin di 2028 e tereno pa dùmp shushi na Selibon Lagun na Boneiru definitivamente mester sera i den 2025 i 2026, kolegio ehekutivo di Boneiru ta pone sufisiente sèn disponibel pa un operashon di organisashon saludabel. Pa dil ku e rísikonan urgente pa salubridat públiko, naturalesa i medioambiente, ministerio di Asuntunan Interno i Relashonnan den Reino ta bai yuda Boneiru.
E palabrashonnan aki ta pará den e akuerdo firmá awe entre kolegio ehekutivo di Boneiru i sekretario di estado Eddie van Marum di Asuntunan Interno i Relashonnan den Reino. Boneiru i Hulanda di e manera aki ta traha huntu na un kadena di prosesamentu di shushi mas mihó i salú.
E problemanan ku e tereno pa dùmp shushi a surgi durante e último desénas di aña. Solushon pa e situashon na Selibon ta rekerí pa e motibu aki gran esfuerso di tur partido. E rapòrt mas resien di Inspekshon di Ambiente di biba i Transporte (Inspectie Leefomgeving en Transport - ILT) ta mustra ku e situashon ta kada bes mas preokupante i kompleho. ILT ta remarká ku mester fortifiká supervishon i mantenshon (di lei). Kolegio ehekutivo ta risibí sosten di Omgevingsdienst Nederland pa esaki. Via di un kurá será temporario òf supervishon ku kámara, ta evitá ku personanan ku no ta outorisá por subi riba e tereno. Riba término lo bini un kura será permanente rònt di e tereno.
Ta krea un espasio pa dùmp nobo ku ta kumpli ku normanan di medioambiente vigente. Gabinete ta aspirá pa riba término kòrtiku duna un kontribushon na e promé medidanan na e tereno pa dùmp shushi. Pa permití Selibon ehekutá bon trabou, kolegio ehekutivo e aña aki i otro aña, ta pone sèn disponibel pa kompra di material pa tapa, ekipo pisa pa traha kuné riba e tereno di dùmp shushi i trùk pa kolektá shushi. Na total ta trata aki di 6.1 mion euro. Ademas, promé ku promé di yanüari 2027, kolegio ehekutivo ta stipulá tarifanan pa kolekshon i prosesamentu di shushi ku ta kubri gastu, pa kompania i persona privá. Pa mas tarda promé di yanüari 2026 kolegio ehekutivo ta bini ku un plan den kua ta elaborá riba tur e rekomendashonnan di e rapòrt mas resien di ILT.
Banda di e medidanan riba término kòrtiku pa solushoná e problemanan mas urgente, tambe a hasi palabrashon pa mehorashon riba término largu. Ta traha riba un perspektiva riba término largu pa prosesamentu di shushi na Boneiru. Un elemento den esaki ta pa buska sitio alternativo i seramentu mas trempan di Selibon Lagun; pa mas tardá promé di desèmber 2028 na lugá di 2030. Kolegio ehekutivo ta disidí pa mas tardá promé di yüli 2026 riba un sitio alternativo pa prosesamentu di shushi i e medidanan ku mester pa esaki.
Diputado Abraham a firma di parti di Boneiru:
“Ku seramentu mas trempan di e tereno pa dùmp shushi, nos ta kumpli ku deseo grandi di e habitantenan di Lagun. Mi ta kontentu ku, ku e akuerdonan aki lo permití nos mehorá e bienestar di tantu habitante den besindario, empleadonan di Selibon Lagun komo e ambiente físiko di biba i e habitantenan di Boneiru, den futuro serkano. Tambe ta bon ku gobièrnu ta sostené e rekomendashonnan di entre otro Konseho pa Medio Ambiente, ku mester di finansiamentu struktural pa invershon i mantenshon di e infrastruktura di e isla.”
Sekretario di estado Eddie van Marum:
“Nos a hasi palabrashon firme tokante e futuro di dùmpmentu di shushi na Boneiru. Mi ta gradisidu na kolegio ehekutivo pa e echo ku nan ta tuma responsabilidat pa un problema kompleho ku a desaroyá durante e último desénas di aña. Di e manera aki kolegio ehekutivo ta traha riba resultado visibel i palpabel pa e habitantenan di Boneiru.”
