E Kordinadó Nashonal kontra Diskriminashon i Rasismo (NCDR) ta wak bèk ku hopi satisfakshon i gratitut riba e konferensia eksitoso “Bridging Distances, Redefining Equality.” E evento a reuní representantenan for di Hulanda Oropeo i Karibense i a marka un paso krusial pa konektá e distansianan geográfiko i sosial denter di Reino.
Imágen: © NCDR
E Kordinadó Nashonal kontra Diskriminashon i Rasismo (NCDR) a tene su konferensia di fin di aña anual na Van der Valk Plaza Hotel na Boneiru, titulá “Konektá, redefiní igualdat - pa un futuro kompartí.” E enkuentro a reuní trahadó- di maneho, mandatario-, organisashon- sosial i habitantenan di tantu Hulanda Karibense komo Hulanda Oropeo, pa un eksplorashon profundo di e desigualdatnan struktural denter di Reino.
Durante vários seshon plenario i temátiko a trata tópikonan manera seguridat di bida, enseñansa, kuido di salú, konektividat i infrastruktura. Tabata ampliamente rekonosé ku e desigualdatnan ku habitantenan di e islanan ta eksperensiá no ta insidental, sino mas bien resultado di relashonnan históriko i eskohonan atministrativo di hopi tempu. Manera Ombudsman Nashonal, Reinier van Zutphen, a bisa den un forma bunita i kla: “Igual, no ekivalente. Mi tin basta di e ‘comply or explain’. E ta simplemente kumpli!”
Durante e konferensia, a sali na kla ku hopi di e retonan riba e islanan ta fortifiká otro. Enfátikamente a menshoná opstákulonan manera oportunidat di enseñansa limitá, kuido di salú inadekuá, pobresa, oportunidat ekonómiko limitá i infrastruktura insufisiente. Partisipantenan a enfatisá ku no por atendé e problemanan aki riba nan mes, pero nan ta rekerí un aserkamentu integral den kua áreanan di maneho ta mihó kordiná ku otro. A konsiderá mehorashon di e konekshonnan físiko i sosial entre e islanan i Hulanda Oropeo komo un rekisito krusial. Di ámbos banda. Segun e palabranan bunita di DG Arne van Hout: “Ta nos responsabilidat pa superá e diferensianan.”
Un resultado klave di e konferensia tabata e yamada konhunto pa desaroyo di agènda di maneho integral ku ta konektá enseñansa, kuido di salú, infrastruktura i desaroyo sosioekonómiko. Ademas a enfatisá e importansia di e bos di habitante- i organisashonnan lokal. Mester traha maneho den kolaborashon estrecho ku sosiedat i no mester imponé esaki for di ariba. Tambe a enfatisá ku invershonnan den infrastruktura, inkluyendo transporte, konektividat digital i logístika, ta nesesario pa oumentá oportunidat i kombatí eksklushon. A proponé medidanan adishonal pa enseñansa, pa mehorá oportunidatnan di karera i sostené multilingwismo mas mihó. Den e área di salubridat, e yamada tabata pa mehorá akseso na kuido spesialisá i sosten pa nesesidatnan di kuido kompleho.
E konferensia a mustra bon kla ku e ròl di NCDR komo un brùg entre gobièrnu, organisashon- i habitantenan ta esensial. NCDR lo sigui rekohé señal di ‘feedback’, pone esaki riba agènda, i tradusí esaki na nivel di maneho, pa di e forma ei keda un instigadó klave di kambio struktural. A kompartí e sentido di urgensia ampliamente durante e konferensia: desigualdatnan eksistente ta profundamente ankrá i tin un impakto direkto riba e bida diario di hopi habitante. E partisipantenan a ekspresá nan speransa ku den e tempu benidero lo tradusí e medidanan - ku tabata na diskushon - den pasonan tangibel.
