Rijksinspectie Digitale Infrastructuur (RDI) ta otorgá un konseshon na Starlink pa asina ofresé servisionan di komunikashon di satélite na Boneiru, Sint Eustatius i Saba. E konseshon ta bálido pa un periodo di diessinku aña.
Na yüli 2024, RDI a instruí Starlink pa stòp di duna servisionan di satélite na Hulanda Karibense, komo ku e kompania no tabatin un konseshon bálido. Korto tempu despues, Starlink a entregá un petishon, pero RDI a rechasá esaki pasobra e kompania no a kumpli ku tur e rekisitonan. Na yüli 2025, Starlink a bolbe entregá un petishon. E biaha aki, e kompania a kumpli ku tur e rekisitonan i RDI a otorgá e konseshon.
E konseshon ta permití Starlink ofresé servisio di internèt via su ret di satélite na persona i negoshinan na Boneiru, Sint Eustatius, i Saba. RDI i Autoriteit Consument en Markt (ACM) ta vigilá kumplimentu ku e reglanan i e kalidat di servisio.
Si tin kualke pregunta tokante e otorgamentu di konseshon, por tuma kontakto ku Rijksinspectie Digitale Infrastructuur via telefòn na +599 717 3140 òf via meil: bes@rdi.nl.