Eerste Kamer ta bai di akuerdo ku e Lei Protekshon kontra Diskriminashon na Boneiru, Sint Eustatius i Saba

A base di artíkulo 1 di Konstitushon, na Hulanda Oropeo tin diferente lei na vigor ku ta garantisá trato igual. Na Boneiru, Sint Eustatius i Saba ainda e leinan aki no tabata na vigor. Ku e lei nobo ta eliminá e diferensia aki: pronto, legislashon ku ta ofresé protekshon kontra diskriminashon lo konta pa Hulanda kompleto.

Anteriormente, investigashon a demonstrá ku e legislashon pa trato igual ta importante pa e habitantenan di Boneiru, Sint Eustatius i Saba. Awor ku e lei ta aprobá, pronto habitantenan lo por hasi un apelashon riba e lei ora nan ta sinti nan mes diskriminá, por ehèmpel pa motibu di nan trasfondo, religion, sekso òf preferensia seksual. Pa esaki nan lo haña akseso na un fasilidat pa kombatí diskriminashon ku lo inkorporá na e lokèt pa asistensia hurídiko grátis ku ta den preparashon na kada isla. Einan pronto lo tin konseheronan ta traha ku tin konosementu di lei i ku ta registrá notifikashon di siudadano tokante diskriminashon ku nan a eksperensiá, ofresé un orea pa skucha, i ku huntu ku e notifikadó lo stipulá posibel pasonan ku ta sigui.

Ku e legislashon aki, College voor de Rechten van de Mens (e Kolegio pa Derechonan Humano) ta haña un tarea di huisio nobo na Boneiru, Sint Eustatius i Saba. Esaki ta enserá ku siudadanonan por entregá un petishon serka e Kolegio pa husga si den nan situashon por papia di diskriminashon.

Minister Rijkaart van Binnenlandse Zaken en Koninkrijksrelaties: “Ku e lei aki tur habitante di nos isla ta haña mesun protekshon kontra diskriminashon. I no solamente riba papel, pasobra danki na e lokètnan ku ta bai habri, hendenan riba e islanan ta risibí ayudo i asistensia dirèkt. Esei ta importante: No ta pèrmití pa ekskluí ni trata hende diferente.”

Ta aspirá ku pa promé di yanüari 2026 e lei aki ta drenta na vigor.