Sekretario di estado pa Asuntunan Interno i Relashon den Reino, Eddie van Marum, ta bishitá e parti karibense di Reino di 13 te ku 18 di òktober. Meta prinsipal ta pa sera konosí ku kolegio ehekutivo i konseho insular di Bonaire, Sint Eustatius i Saba. Ku nan señor Van Marum lo papia entre otro riba e kambionan den Lei Entidatnan Públiko BES (WolBES). Ademas lo informá señor Van Marum tokante e Akuerdonan Regional i e ta papia ku empresario- i organisashonnan ku ta atendé ku siguridat di kuminda i protekshon di naturalesa. Tambe e ta kombersá ku habitantenan den besindario di Lagun, kaminda Selibon ta prosesá sushi.
Imágen: © Sekretario di estado Van Marum
Sint Maarten
E sekretario di estado ta yega den fin di siman na Sint Maarten kaminda ku minister-presidente Mercelina lo risibié. Tambe wardakosta lo ofres’é un paseo den boto.
Sint Eustatius
E bishita di trabou ta inisiá ofisialmente riba djaluna 13 di òktober na Sint Eustatius ku un kòmbersashon ku STENAPA tokante e desafionan pa naturalesa i medioambiente. Despues e ta bishita haf i e ta risibí informashon tokante e trabounan riba e klep. Tambe lo informá e sekretario di estado tokante e Akuerdo Regional Sint Eustatius i aktividatnan relashoná ku konmemorashon di ‘First Salute Statia’ 2026. Durante un rekorido riba e isla ku diputado Rechelline Leerdam, e ta sera konosí ku inisiativanan di agrikultura.. Bèrdura i fruta pagabel pa e poblashon lokal ta di gran importansia pa Sint Eustatius. Mas lat riba e dia ei e sekretario di estado lo sera konosí ku kolegio ehekutivo i konseho insular.
Saba
Van Marum ta yega Saba mainta tempran ku fèri. Despues di su yegada e tin un desayuno pa sera konosí ku kolegio ehekutivo. Despues e ta sera konosí ku konseho insular. Seguidamente e ta bishitá e sitio kaminda ku e haf nobo ta proyektá. Despues e ta papia ku Saba Conservation Foundation tokante kondishon di naturalesa na Saba i oportunidatnan pa turismo di naturalesa. E sekretario di estado ta bishitá St. John’s relashoná ku e Akuerdo Regional Saba. Un komponente di esaki ta konstrukshon di un sentro multifunshonal i un skol nobo. Ta sera e dia ku un rekorido riba e isla, kaminda e enfoke ta riba proyektonan agrikultura, reforestashon, proyekto di peska i siguridat di kuminda.
Kòrsou
Na Kòrsou e sekretario di estado ta papia ku minister-presidente Gilmar Pisas i gobernador Lucille George-Wout. Sekretario di estado Van Marum ta papia tambe ku agrikultor- i piskadónan. Despues e ta bishitá Komité di Konmemorashon Pasado di Sklabitut, kaminda ku e lo papia ku hóbennan.
Boneiru
Na Boneiru e sekretario di estado ta bishitá e kompania ku ta prosesá sushi, Selibon. Tambe e ta papia ku Fundashon Pro Lagun, ku ta representá habitantenan den besindario di lèntfel. Durante di un bishita na kompania di awa i elektrisidat WEB, gerensia lo informá e sekretario di estado tokante konsekuensianan di e kresementu rápido di Boneiru, pa seguridat di energia i e lo haña un rekorido na e planta di awa riba e tereno na Hato. Lo atendé e tema di konservashon di naturalesa ku Stinapa durante un rekorido ku boto den e mondi di pal’i mangel. Na Boneiru e sekretario di estado ta papia ademas ku kolegio ehekutivo i konseho insular, direktor di Rijksdienst Caribisch Nederland, Enviadó Spesial di Union Oropeo i miembronan di Diálogo Sentral.
Durante e último dia di e bishita di trabou, señor Van Marum ta papia ku e departamentu di Agrikultura, Peska i Krio di Bestia di Entidat Públiko Boneiru i e ta bishitá algun proyekto agríkola. Ta sera e bishita di trabou ku un rekorido riba e isla bou di guia di Nolly Oleana, kaminda ta bishitá entre otro áreanan di naturalesa i e kasnan di katibu.