Riba 8 di òktober a publiká e Besluit kinderopvang BES (Desishon akohida di mucha BES) serka e Wet kinderopvang BES (Lei akohida di mucha BES). Den dje a spesifiká e reglanan ku lo ta na vigor entrante promé di yanüari 2026 pa kalidat, interkambio di dato, i finansiamentu di akohida di mucha na Boneiru, Sint Eustatius i Saba. E meta di e legislashon i regulashon nobo ta pa ofresé akohida di mucha bon, seif i pagabel na Hulanda Karibense, di moda ku kada mucha tin e oportunidat pa desaroyá su mes kompletamente.
Eksigensianan di kalidat ku ta kuadra ku e konteksto karibense
Entrante promé di yanüari 2026, e legislashon i regulashon nobo ta drenta na vigor. Hopi di e reglanan di kalidat ta kuadra ku e eksigensianan ku ya ta na vigor kaba via e Ordenansa Insular Akohida di mucha. A papia tokante e reglanan aki vários biaha durante seshonnan di konsulta ku organisashonnan di akohida di mucha, mayornan i otro partidonan embolbí. A base di esaki, kaminda ku ta nesesario a adaptá e reglanan na e konteksto karibense. Asina por ehèmpel ta konta e pòrch di un akohida di mucha parsialmente komo espasio paden na momentu di determiná e kantidat di mucha ku ta permití pa duna akohida. Tambe, no ta na nodi pa tur kolaboradó tin mínimo un diploma mbo-3. Tin un kualifikashon di tim na vigor kaminda kolaboradónan ku kualifikashon mas abou, ku por ehèmpel ainda ta den formashon, por traha huntu ku kolaboradónan na nivel mbo-3 den un akohida di mucha.
Ademas, a mehorá e eksigensianan di kalidat pa prevení retraso den desaroyo i siñamentu serka e muchanan. Asina, un akohida di mucha por ehèmpel mester sigui desaroyo di e muchanan, i den e akohida di mucha, traha ku un programa pa edukashon pre-eskolar. Den e akohida despues di skol mester tin un programa di aktividat variá ku ta mas ku djis traha hùiswèrk. Den e legislashon i regulashon a elaborá kiko e programanan aki mester kumpli kuné.
Finansiamentu akohida di mucha
For di e di dos kuartal di 2026, e unidat SZW di RCN ta bai paga e kompensashon pa akohida di mucha ku e organisashonnan di akohida pa mucha ta haña di gobièrnu. Den e añanan benidero e kompensashon aki ta bai subi, riba un indeksashon anual, tantu pa e akohida di mucha komo e akohida despues di skol. Pa e sumanan, por fabor konsultá e wèpsait di e unidat SZW di RCN: www.rijksdienstcn.com/akohidadimucha.
Den e legislashon i regulashon tambe a elaborá e reglanan finansiero i e kondishonnan pa finansiamentu. Asina, un akohida di mucha por ehèmpel solamente ta haña kompensashon pa akohida di un mucha ora ku e mayornan i e mucha ta inskribí komo residente i a fiha e palabrashonnan entre e mayornan i e akohida di mucha den un kontrakt di akohida di mucha. Tambe, e mucha mester ta strukturalmente presente na e akohida.
Pagabel i aksesibel pa tur mayor
Na 2026 e mayornan ta sigui paga meskos ku nan ta paga awor. Entrante 2027, lo baha e kontribushon di mayor mas aleu hasié 4% di e gastunan di akohida di mucha. Pa garantisá ku akohida di mucha ta keda aksesibel pa tur mucha, organisashonnan di akohida di mucha no por kobra mayornan gastunan èkstra. Mayornan ku no por paga e kontribushon di mayor por pidi supsidio pa lugá na akohida na Entidat Públiko.
Supervishon pa inspekshon
Inspekshon di Enseñansa, den kolaborashon ku inspektornan lokal, anualmente ta supervisá kalidat di e akohida di mucha. A base di e informe di inspekshon ku kada akohida di mucha ta haña, organisashonnan di akohida di mucha por traha riba tareanan di rekuperashon i mehorashon mas aleu di nan akohida di mucha.
Entrante 2026 tambe lo publiká e informe di inspekshon di kada akohida di mucha. Si no sigui e tareanan di rekuperashon di inspekshon, inspekshon tin e posibilidat di apliká lei, por ehèmpel ku un but òf siere temporal si tin un riesgo pa salubridat òf seguridat di mucha.
Riba e wèpsait www.best4kids.nu (klik riba ‘Wet- en regelgeving’, legislashon i regulashon) tin un resúmen di e lei i un pelíkula di animashon. Ademas, por haña tambe tur regla ku ta na vigor for di 2026 riba e wèpsait aki.