Djabièrnè último, dia 3 di òktober, e Feria di Karera organisá pa Plenchi di Trabou a tuma lugá. E Feria di Karera ta para pa kresementu, kolaborashon i moveshon riba e merkado laboral di Boneiru.
Bou di un dak, no ménos ku 35 organisashon a bini huntu, pa presentá nan mes komo dunadó di trabou na buskadó di trabou na Boneiru. Ku 300 bishitante registrá, por konsiderá e Feria di Karera komo eksitoso.
Resúmen di e dia
E dia a kuminsá ku un apertura ofisial di parti di gezaghèber John Soliano, i a sigui ku palabranan di inspirashon di Yitza Davelaar, Aimed Ayubi i Pastor Curtis.
Durante e dia, e dunadónan di trabou a haña oportunidat pa presentá nan organisashon i hiba kòmbersashon ku kandidatonan potensial, miéntras ku e partisipantenan a haña konosementu di temanan aktual riba merkado laboral.
Bishitantenan por a partisipá na diferente tayer i demonstrashon ku ta enfoká riba desaroyo personal, kresementu profeshonal i oportunidat di karera.
Jandino Asporaat, a sa toka i motivá e públiko na su propio manera rekonosibel, durante un klousura plenario energétiko.
Un bista bèk Plenchi di Trabou
Plenchi di Trabou ta mira bek riba un dia inspirativo i edukativo. Ku e Feria di Karera 2025, Plenchi di Trabou a mustra un biaha mas ku konekshon riba merkado laboral ta kuminsá ku enkuentro. Dor di traha huntu nos ta konstruí konhuntamente na un Boneiru mas fuerte, duradero i dirigí riba futuro.
Plenchi di Trabou ke yama tur organisashon ku a partisipá, partner i bishitante danki pa nan kontribushon na un dia eksitoso. Nan embolbimentu i entusiasmo, a mustra ku na Boneiru tin espasio amplio pa siña, krese i konektá.