Outoridat Konsumidó & Merkado (ACM) a stipulá un método nobo pa determiná tarifanan máksimo di elektrisidat i awa di bebe na Boneiru, Sint Eustatius i Saba. Ku e método nobo akí ACM ta duna produktornan di elektrisidat un insentivo adishonal pa produsí duradero. E método nobo ta drenta na vigor entrante promé di yanüari i tin un durashon di seis (6) aña.
Anualmente ACM ta stipulá tarifanan máksimo pa produkshon i distribushon di elektrisidat i awa di bebe na Hulanda Karibense. ACM ta hasi esei a base di un método di regulashon. Ei den tin e reglanan, ku kua ACM ta stipulá e tarifanan máksimo kada bes di nobo. E método aktual tabata seis (6) aña bálido i a inisiá na 2020. Pa e motibu ei tin mester di un método di regulashon nobo entrante 2026.
Den e método di regulashon nobo tambe, riba promé di yüli di kada aña, ACM lo ahustá kada bes di nobo e tarifanan máksimo pa elektrisidat, basá riba desaroyo di preis di petroli. ACM ta hasi ahuste provishonal, komo ku e preis di petroli ku ta fluktua fuertemente ta un komponente importante di e tarifanan di elektrisidat. Komo ku preis di petroli tin ménos influensia riba gastu di awa di bebe, ACM no ta ahustá e tarifanan di awa di bebe tampoko den e método nobo di regulashon.
Debí na altura i fluktuashon di preis di petroli i debí na konsekuensianan negativo pa klima okashoná pa produkshon di elektrisidat ku zeta, ACM ta stimulá kompanianan di utilidat pa produsí mas duradero. Eskoho pa e forma ku kompanianan di utilidat ta generá elektrisidat ta keda finalmente na e kompanianan di utilidat, pero ACM ta kere ku tin sufisiente espasio ainda pa hasié mas duradero. Na e momentunan akí e proporshon di produkshon duradero di elektrisidat na Boneiru ta alrededor di 25% (bientu i solo), na Sint Eustatius 50% (solo) i na Saba 30% (solo). Konsumidó- i otro usuarionan ta benefisiá di produkshon mas duradero di elektrisidat den forma di tarifanan ku ta dependé ménos di preis di petroli haltu i ku ta fluktua i un mihó klima.