Trafikashon di hende no ta para di su mes. Keda alerta. Mèldu e señalnan

E mensahe ta kla: trafikashon di hende no ta kaba despues di awe. Eksplotashon di hende ta pasa durante henter aña, hopi biaha skondí i mas serka ku nos ta pensa. Pa e motibu ei ta importante pa tur hende keda alerta riba señalnan i tin kurashi pa mèldu si algu no ta korekto.

Kiko ta trafikashon di hende?

Trafikashon di hende ta nifiká ku ta eksplotá hende kontra su boluntat. Esaki ta pasa den diferente forma:

• Eksplotashon di labor – por ehèmpel, un persona ta traha dianan largu sin  salario.
• Eksplotashon seksual – ta obligá un persona pa hasi akto seksual.
• Eksplotashon kriminal – prinsipalmente ta usa hóben pa hasi kos ilegal, manera transportá droga òf hòrta.

Víktima hopi biaha no tin kurashi pa pidi yudansa e mes. Pa e motibu ei mes ta importante pa hendenan ku ta para na banda siña rekonosé e señalnan.

Atenshon kontinuo

Den e siman promé ku 18 di òktober a pidi atenshon èkstra riba e tema na tur tres isla. Ku spòtnan di radio, medionan sosial i emishon di e programa di radio Keda Informá (Boneiru) i Stay Informed (Sint Eustatius i Saba) a hasi e yamada kla: rekonosé e señalnan i mèldu esaki. E kampaña aki ta parti di e programa kontinuo kontra trafikashon di hende. Atenshon no ta para despues di 18 di òktober. Trafikashon di hende no ta un problema di un solo biaha. Keda alerta i reportá ta importante henter aña, segun e partnernan ku ta traha huntu: KPCN, IND CN, Koninklijke Marechaussee i RIEC CN.

Tin duda? Mèldu tòg

Bo por mèldu seif i anónimo. Bo no mester ta sigur si ta trafikashon di hende. Un sospecho por ta sufisiente pa por inisiá e proseso di yudansa. Bo notifikashon por hasi diferensia pa un hende ku no ta mira salida. Por mèldu via liña di tep anónimo di KPCN: 9310 òf via meil: meldmensenhandel@politiecn.com. Pa mas informashon, wak www.rijksdienstcn.com

Solamente huntu ku komunidat nos por para trafikashon di hende. Huntu kontra trafikashon di hende. Nos islanan, nos responsabilidat.