Pa promé biaha lo tin un espasio físiko kaminda ku habitantenan por bai pa informashon grátis, konseho i ayudo ku preguntanan hurídiko i diskriminashon. E fundashon ku ta bai ofresé e yudansa aki ta ofisialmente establesé. E nòmber di e fundashon na Boneiru ta Lokèt Hurídiko, na Sint Eustatius i Saba, Legal Desk. E fundashon ta un kontinuashon struktural di e proyekto piloto ‘Legal Desk’, ku pa basta tempu kaba ta den funshon na Saba i resientemente na Sint Eustatius.
Na e fundashon denter di poko lo bo por:
- Haña informashon i konseho tokante kasonan hurídiko, manera konflikto ku un dunadó di trabou, problema ku hür òf kasonan familiar;
- Mèldu diskriminashon ku bo ta eksperensiá, por ehèmpel na momentu ku bo risibí trato diferente pa motibu di bo orígen òf limitashon.
Esaki ta un paso importante pa sòru ku tur hende den e parti karibense di Hulanda ta risibí e mesun trato ku Hulanda Oropeo.
Kiko ta pasa awor?
E lunanan benidero e fundashon lo bai tuma empleado i drecha lokalidat riba e tres islanan. E meta ta pa fortalesé protekshon legal di habitantenan, di manera ku bo ta na altura na unda bo por bai ku preguntanan hurídiko òf preokupashon.
E servisio ta inisá den e promé mitar di 2026. Asina ku e espasio pa e lokèt i orario ta disponibel, lo kompartí esaki ku bo, entre otro via di https://www.rijksdienstcn.com/.
Ken ta bai dirigí e fundashon?
Ku establesimentu di e fundashon e promé karanan di e fundashon tambe ta konosí. Suhendra Leon, ku tin eksperensia amplio riba e tereno di protekshon legal, a ser nombrá komo direktor-gerente.
Ademas a forma un Hunta di Supervishon ku Shima Rouse, Reza Asgarali, i komo presidente Marga Buys-Trimp.
Direktor-gerente Suhendra Leon:
“Pa hopi hende e no ta lógiko pa sa na unda nan mester bai si nan tin un problema hurídiko òf ta risibí trato desigual. Ku e fundashon aki nos ke kambia esaki. Kada habitante di Boneiru, Sint Eustatius i Saba mester por yega pa informashon independiente i konseho tokante derecho i obligashon.”
Presidente di Hunta di Komisario Marga Buys-Trimp:
“Komo Hunta di Komisario nos ta enormemente motivá pa sostené e direktor pa inisiá rápidamente ku e fasilidatnan aki; e demanda pa esaki ta haltu i ta importante pa e lokèt bira aksesibel i ampliamente konosí.”
Tambe e mandatarionan enbolbí ta pone énfasis riba e nifikashon di establesimentu di e fundashon:
Sekretario di Estado Rutte (Hustisia i Seguridat):
“Esaki ta un logro remarkabel: Boneiru, Sint Eustatius i Saba awor tin un fundashon ku ta bai sòru pa lokèt físiko pa ayudo i konseho riba problemanan hurídiko í protekshon kontra diskriminashon. Ku esaki nos ta sòru pa ayudo legal aksesibel i nos ta habri porta pa hustisia i trato igual pa tur hende. Un fasilidat ku pa basta tempu ta un nesesidat riba e islanan.”
Minister Rijkaart (Ministerio di Asuntunan Interno i Relashonnan den Reino):
“Dia 7 di òktober Eerste kamer a bai di akuerdo ku e Lei Protekshon kontra Diskriminashon na Boneiru, Sint Eustatius i Saba. P’esei despues tur lei ku ta protehá kontra diskriminashon ta bálido riba henter e isla. Ku e fundashon aki nos ta sòru tambe pa habitantenan di Boneiru, Sint Eustatius i Saba tin aksesibilidat pa yega na momentu ku nan ta risibí trato desigual. Esaki ta hopi importante i mi tin tur konfiansa ku e direktiva nobo di e Hunta di Supervishon lo ehekutá e trabou aki ku dedikashon.”
Ku e Lei nobo di Protekshon kontra Diskriminashon riba Boneiru, Sint Eustatius i Saba, e Kolegio di Derechonan Humano tambe ta haña un tarea di huisio riba e islanan. Esaki ta nifiká ku siudadano por entregá un petishon na e Kolegio pa evaluá si den su kaso ta trata di diskriminashon.