Konferensia di fin di aña di NCDR na Boneiru ‘Konektá, redifini igualdat: pa un futuro kompartí.’

Na Hulanda Karibense, ta eksistí diferensianan persistente den akseso na kuido di salú, enseñansa, seguridat di eksistensia, protekshon hurídiko i partisipashon. E desigualdat aki no ta un insidente riba su mes, pero resultado di relashonnan históriko i atministrativo profundamente ankrá ku ta sigui tin un impakto te awe.

E tenshon entre Hulanda Karibense komo un parti kompletu di Hulanda i e realidat postkolonial di tur dia ta pidi un búskeda konhunto pa solushon. No for di dokumentonan apstrakto di maneho, sino den diálogo ku e hendenan ku ta embolbí: habitante-,  mandatraio-, trahadó- di maneho, organisashon- sosial i sientífikonan di Hulanda Oropeo i Karibense.

NCDR ta mira su ròl komo un brùg ku ta konektá e diferente mundunan. Durante aña pasá, NCDR a organisá diferente seshon di informashon na Boneiru, ku e konferensia di fin di aña komo punto final e aña aki.

Rabin Baldewsingh, Kordinadó Nashonal kontra Diskriminashon i Rasismo (NCDR):

“Mi ta konsidera esaki komo mi responsabilidat pa huntu minimalisá e distansia entre e dos partinan di Hulanda. Huntu nos ta konstruí un futuro kaminda tur hende den Hulanda, sin importá unda nan ta biba, tin mesun oportunidat i derecho”.

E konferensia aki ta primintí di ta un eksperensia inolvidabel, ku oradornan inspirativo manera Glenn Thodé, Lysanne Charles i Ombudsman Nashonal, ku lo kompartí nan vishon- i eksperensianan balioso. Gezaghèbernan di Saba, Sint Eustatius i Boneiru tambe ta partisipá na e debate. Ademas di seshonnan plenario, tin seshonnan di ‘breakout’ riba e temanan: seguridat di eksistensia, enseñansa, kuido di salú i konektividat i infrastruktura.

Seguridat di eksistensia

Na 2022, mas o ménos 25% di muchanan na Boneiru i Saba, i 28% na Sint Eustatius, tabata kore riesgo di lanta den pobresa. Pobresa ta oumentá e riesgo di retraso den desaroyo, oportunidat edukashonal limitá, problema ku salú i eksklushon sosial, ku daño duradero na e mucha i famia. Ademas, pobresa struktural ta stroba desaroyo di e islanan. Na mes momento, kombatí pobresa ta rekerí un aserkamentu integral, enfoká riba kuido di salú, edukashon i bibienda.

Enseñansa

Enseñansa ta un di e hèrmèntnan mas poderoso pa konstruí un sosiedat hustu i promové oportunidat igual. Na mes momento, enseñansa ta un di e áreanan kaminda desigualdat ta mas visibel aktualmente. Hóbennan riba e islanan ta enfrentá un trayekto edukativo limitá, progreso stanká i un falta di perspektiva realístiko pa un kualifikashon inisial. Multilingwismo, ku e potensial di ta un forsa i rikesa kultural, hopi biaha ta un barera den práktika di enseñansa aktual.

Kuido di salú

Kuido di salú na Hulanda Karibense ta enfrentá retonan kompleho. E karakter insular i eskala chikí di e islanan ta pone ku hopi biaha ta buska kuido médiko kompleho na Sur Amérika òf islanan mas grandi. Ademas, den averahe, habitantenan di Hulanda Karibense tin un ekspektativa di bida mas abou i un salú mas malu ku habitantenan di Hulanda Oropeo.

Konektividat i infrastruktura

E interkonekshon limitá entre Boneiru, Sint Eustatius i Saba (i otro islanan den Karibe) tin konsekuensia direkto pa desaroyo ekonómiko di e islanan, pero tambe pa bienestar di nan habitantenan i partisipashon sosial i e isolamentu di partikularmente esnan ku tin e entradanan mas abou i hóbennan. Di mes manera, e falta di invershon den infrastruktura di kayanan ta krea desigualdat indeseabel kompará ku e kalidat di infrastruktura na Hulanda Oropeo: esaki tin konsekuensianan ekonómiko, pero tambe ta afektá habitantenan pa medio di un riesgo mas haltu di aksidente i dependensia kontinuo di outo. Partikularmente e ta afektá gruponan vulnerabel manera hende grandi, mucha, i persona ku desabilidat.

Mas informashon

Pa mas informashon tokante e oradornan i seshonnan di ‘breakout’, por fabor bishitá nos wèpsait: Najaarsconferentie 2025