Sekretario di estado di Asuntunan Interno i Relashonnan den Reino, Eddie van Marum, di 10 te 15 di ougùstùs, lo hasi un bishita di trabou na Sint Maarten, Aruba i Kòrsou. Esaki lo bira su promé biahe pa e parti karibense di Reino, for di momentu ku el a tuma e kartera di Relashonnan den Reino di su antesesor. E enfoke di e bishita di sekretario di estado Van Marum ta, sera konosí ku e isla- i gobernantenan. Tópikonan importante durante e bishita di trabou ta entre otro siguridat di kuminda, rekonstrukshon na Sint Maarten i desaroyo ekonómiko.
Imágen: © Sekretario di estado Van Marum
Sint Maarten
E bishita ta inisiá mesora despues di yegada riba djadumingu, 10 di ougùstùs, ku un rekorido na tantu e parti hulandes, komo e parti franses di e isla. Tambe e sekretario di estado ta sera konosí ku e timnan di Representashon di Hulanda na Philipsburg i di e Organisashon di Trabou Temporal. Riba djaluna, 11 di ougùstùs, e parti ofishal di e bishita di trabou ta kuminsá ku sera konosí ku gobernador Ajamu Baly, promé minister Luc Mercelina i Konseho di Minister i presidente di parlamento di Sint Maarten, Sarah Wescot-Williams. E atardi ta den kuadro di maneho di krísis durante temporada di orkan i rekonstrukshon despues di e orkanan devastadó, Irma i Maria. E sekretario di estado ta papia ku partnernan ku ta atendé ku maneho di krísis i ta hasi un rekorido huntu ku National Recovery and Program Bureau (NRPB) na diferente proyekto di rekonstrukshon. Por ehèmpel e ta bishitá e konstrukshon nobo di hòspital i e proyekto di maneho di sushi: Emergency Debris Management Project. Tambe e sekretario di estado lo laga nan inform’é tokante e Enterprise Support Project, ku tin komo meta, stimulá empresanan mediano i chikí lokal na Sint Maarten. Ta klousurá e bishita na Sint Maarten ku un enkuentro ku e partnernan di e kadena di mantenshon di lei, inkluyendo minister di Hustisia di Sint Maarten, Nathalie Tackling.
Aruba
Djamars,12 di ougùstùs, señor Van Marum lo sigui biaha pa Aruba, unda e ta kuminsá ku sera konosí ku kolaboradornan di Representashon di Hulanda na Oranjestad. Pa e parti ofishal di e bishita di trabou na Aruba, e ta realisá un bishita serka gobernador arubano, Alfonso Boekhoudt. Despues e ta sera konosí ku presidente di Parlamento di Aruba, Marlon Sneek i e lidernan di frakshon di e partidonan den Parlamento arubano.
Riba djárason, 13 di ougùstùs, señor Van Marum ta papia ku promé minister Mike Eman, vice promé minister i minister di Relashonnan den Reino, Enseñansa, Hubentut, Inovashon i deporte Gerlien Croes, i minister di Finansa, Asuntunan Ekonómiko i Sektor Primario Geoffrey Wever. Un di e prioridatnan di e sekretario di estado ta e tema di siguridat di kuminda. Pa esaki gabinete a pone EUR 24 mion disponibel pa medio di un fondo kontinuo ku mester krea ainda. Na Aruba pa e motibu ei tin riba programa, un bishita na AGRI Innovation Park. E inisiativa akí ta enfoká riba desaroyo agríkola duradero i siguridat di kuminda. Den oranan di atardi e sekretario di estado ta bishitá diferente sitio riba e isla, entre otro San Nicolas i Palm Beach. Na final di e dia, señor Van Marum ta biaha pa Kòrsou.
Kòrsou
E bishita na Kòrsou ta kuminsá riba djaweps, 14 di ougùstùs, ku un kòmbersashon di introdukshon ku gobernador Lucille George-Wout. Riba 4 di novèmber e ta baha komo gobernador di Kòrsou, despues di dos término. Señor Van Marum despues tin un enkuentro ku Konseho di Minister di Kòrsou, bou di guia di vice promé minister, Javier Silvania. Tambe e sekretario di estado ta papia ku presidente di Staten, Fergino Brownbill, i e ta sera konosí ku e miembronan di komishon Relashonnan den Reino. Den oranan di atardi e sekretario di estado ta bishitá Hòfi Cas Cora, un kunuku ekológiko manehá pa empresarionan lokal hóben. Despues ta tuma lugá un kòmbersashon ku partnernan di kolaborashon, embolbí ku e tema di fronteranan sigur. Den oranan di atardi e sekretario di estado, durante un kanamentu den e parti di siudat, Otrobanda, ta topa ku e sosiedat sivil i representantenan di sektor komersial/empresarial na Kòrsou. Bou di guia di ‘rangernan’ di e instituto di investigashon, Carmabi, e sekretario di estado ta bishitá e parke di pal’i mangel di Kòrsou. Na e sitio e sekretario di estado lo risibí informashon tokante vulnerabilidat di pal’i mangel i di koral. Riba e dia akí tin planiá tambe pa sera konosí ku e tim di Representashon di Hulanda na Willemstad.
Djabièrnè, 15 di ougùstùs, ta atrobe e último dia di e bishita di trabou. Den oranan di mainta e ta bishitá ofisina di e Komité di Konmemorashon Pasado di Sklabitut ku a habri resientemente, komo tambe e monumento pa lider di resistensia, Tula. Mirando importansia di siguridat di kuminda, sekretario di estado Van Marum ta bishitá Zakito tambe, kaminda e ta papia ku e kooperativa di piskadó i un representante di LVV: Agrikultura, Krio di bestia i Peska. Tambe e ta bishitá fundashon Bob. E fundashon akí ta hasi esfuerso pa protehá i eduká tokante paranan nativo. Finalmente e sekretario di estado, den kuadro di siguridat di kuminda, ta bishitá un supermerkado lokal na Kòrsou.