Minister Mona Keijzer di Bibienda i Ordenamentu Spasial a inisiá ku e konsulta via internèt tokante e Woningwet-BES (Lei di Bibienda-BES) dia 5 di ougùstùs 2025. E proposishon di lei akí ta destiná pa garantisá konstrukshon di bibienda sosial mas pagabel na Hulanda Karibense.
Ku e proposishon di lei e asosiashonnan di bibienda por bai apliká pa un státus ofisial komo institushon aprobá. E ora ei nan ta bai kai bou di supervishon di e Outoridat di asosiashonnan di bibienda (Autoriteit woningcorporaties, Aw), ku ta supervisá asosiashonnan di bibienda na Hulanda. E supervishon akí ta garantisá ku asosiashonnan di bibienda ta organisashonnan profeshonal i finansieramente sólido. Un problema grandi riba e islanan awor ta ku hopi biaha asosiashonnan di bibienda por haña solamente fiansa ku interes haltu i tin biaha ku términonan desfaborabel. Esaki ta pone ku ta bira difísil pa bai konstruí sufisiente bibienda pagabel.
Ku un státus komo asosiashon aprobá, asosiashonnan di bibienda por partisipá den e Fondo di Garantia di Bibienda Sosial (Waarborgfonds Sociale Woningbouw, WSW). E fondo akí ta garantisá e pagamentu bèk di fiansa, konosí komo fiansa garantisá. Pa bankonan, esaki ta nifiká ku ta kore ménos riesgo. Esaki ta permití nan duna fiansa ku interes mas abou i bou di mihó kondishon.
Mas bibienda sosial i mehorashon di bibienda abitabel
Ku e akseso mehorá na finansiamentu asosiashonnan di bibienda por konstruí mas bibienda sosial, mehorá e mantenshon di kasnan eksistente, i invertí den e situashon di bibienda abitabel di e barionan. Esaki ta hopi nesesario, ya ku e islanan ta konfrontá un skarsedat signifikante di bibienda pagabel, spesialmente pa personanan ku un entrada abou òf mediano. Asina e proyekto di lei ta kontribuí na e lucha kontra pobresa.
Sistema na midí pa e islanan
E Lei di Bibienda-BES lo bira un kapítulo separá denter di e Lei di Bibienda di Hulanda eksistente, pero ta adaptá na e situashon na Boneiru, Sint Eustatius, i Saba. Di e forma aki, e proyekto di lei ta konektá mihó ku e nesesidatnan ku tin riba e islanan.
Reakshoná riba e proyekto di lei
Esaki ta posibel te ku 28-9-2025 via e wèpsait pa konsulta via internèt: https://internetconsultatie.nl/woningwetbes.