Den e promé siman di ougùstùs, Stichting Reclassering Caribisch Nederland ta inisiá e kampañá pa informá hóben i mayor mas mihó tokante di lei penal hubenil, partikularmente tokante di ‘jeugdreclassering’. Via media sosial, radio i duna informashon na skolnan, e kampañá ta mustra kiko ta pasa na momentu ku un hóben hañ’é den problema ku hustisia i kon ‘jeugdreclassering’ ta sostené den esaki.
E mensahe ta klá: erornan ta sosodé, pero kon bo ta dil ku nan ta hasi e diferensia.
E kampaña ta konsistí di mensahe riba media sosial, dos transmishon di e programa di radio Keda Informá (28 di ougùstùs i 4 di sèptèmber) i charla na skol. Den e programa di radio ta papia tokante kiko ‘jeugdreclassering’ te enserá i kiko hóben- i nan mayornan por spera na momentu ku supervishon i guia ta nesesario.
“Mi ta spera ku e mensahe realmente yega na e hóbennan i nan mayornan. Ta p’esei nos ta hasié na final di dia.” Esaki Eric Sinke, direktor di Relassering CN, ta bisa.
E kampaña ta enfoká riba hóben ku ta risibí supervishon i guia, hóben ku ta kore riesgo i mayor ku ke sostené su yu. E wèpsait di Reclassering CN ta ofresé diferente hèrmènt práktiko pa pone meta, kumpli ku akuerdo i atendé ku situashon difísil.
Riba nos wèpsait, bo ta haña tep i splikashon kla. Esaki ta pa hóben ku ke sali padilanti i mayor ku ke yuda. Wak riba www.reclassering-cn.com.