Entrante promé di yüli 2025, a nombra Rusco Lamidi komo hefe nobo di Servisio di Imigrashon i Naturalisashon Hulanda Karibense (IND CN). Su propio historia di migrashon ta duna e nombramentu aki un toke personal: komo mucha chikí el a bini Boneiru for di Sürnam i bira siudadano hulandes riba e isla.
"Pa por dirigí e organisashon ku den un sierto sentido tabata mi mes lokèt tambe, pa mi ta un sintimentu hopi spesial", segun Lamidi.
Sigui traha riba servisio
IND CN tin hopi aña ta enfoká riba un aserkamentu enfoká riba kliente pa dunamentu di servisio. Lamidi ke sigui riba esaki ku mehorashon di prosesonan i pa hasi e servisio mas lihé, mas kla i mas amabel pa kliente. Habitante i esun ku yega nobo na Boneiru, Sint Eustatius i Saba ta dependé hopi biaha di desishon di IND CN pa por forma su bida, pa trabou, estudio òf reunion familiar. Pa e motibu ei, ta fundamental pa e proseso kana sin opstákulo, ku informashon kla i un atenshon personal.
Un toke humano i debido diligensia
Pa Lamidi e dimenshon humano ta un punto di salida esensial. Na mes momento, e ta enfatisá e importansia pa kuidadosamente ehekutá maneho di atmishon i mantenshon pa prevení abuso i froude di forma efektivo. “Semper ta hasi esaki ku rèspèt pa hende i den kuadro di lei”, segun Lamidi.
Eksperensia i ‘background’
Lamidi a nase na 1991 na Paramaribo, Sürnam, i komo un beibi di dies luna a muda ku su famia pa Boneiru. Te ku su dies aña el a bai skol Kolegio San Bernardo na Boneiru. Despues el a studia derecho hulandes (spesialisashon den derecho konstitushonal i atministrativo) na Universidat di Groningen.
Anteriormente e tabata traha na IND na Den Haag i for di 2022 na IND CN, kaminda temporalmente e tabata responsabel pa direkshon diario di e ‘front office’. Ku su ròl nobo komo hefe, Lamidi por sigui traha riba su eskoho konsiente pa pone su konosementu i eksperensia na servisio di Hulanda Karibense, na benefisio di tur habitante i esun ku yega nobo na Boneiru, Sint Eustatius i Saba.