Na mei 2024, CBP BES a anunsiá ku lo inisiá un investigashon di un posibel pèrdida di informashon na e departamentu di Registro Sivil di Entidat Públiko Boneiru (EPB). Esaki a bini despues di un notifikashon di un diputado tokante uso di dato personal aktual den un aplikashon digital nobo di OLB. A finalisá e rapòrt kompleto di e investigashon i publiká esaki. E konklushonnan ta preokupante.
Uso ilegal di dato personal
CBP BES a determiná ku a transferí dato personal identifikabel for di PIVA na e ambiente di tèst, sin ku a anonimisá nan promé. No tabatin un base legal pa esaki, no a hasí un Evaluashon di Impakto pa Protekshon di Dato (DPIA), i tabata falta e prosedura interno i liñanan di responsabilidat nesesario. E forma di traha aki ta desviá di e kuadronan legal i responsabilidat usual den e organisashon.
Grupo di Trabou Digital no a traha segun regla
Na 2021, Kolegio Ehekutivo di Boneiru a establesé un Grupo di Trabou di Digitalisashon (WD) apart. E grupo di trabou aki a funshoná pafó di e organisashon ofisial, ku un presupuesto propio i sin un protekshon kla di responsabilidatnan, manera protekshon di datonan personal na OLB. E meta tabata pa hasi digitalisashon di e atministrashon mas lihé, inkluso hasi dato personal aktual di e sistema PIVA disponibel.
A konstatá vários violashon
CBP BES ta konkluí ku a violá tantu e Lei di Protekshon di Dato Personal BES komo e Lei di Atministrashon Básiko di Dato Personal BES. E forma di traha ta kontra prinsipionan di meta, nesesidat i seguridat. E falta di gobernashon i kontròl kouteloso a oumentá e riesgo pa eror òf mal uso di dato personal.
CBP BES ta duna rekomendashon
CBP BES ta pidi OLB pa stòp inmediatamente ku uso di dato personal aktual den e ambiente di tèst i pa eliminá e datonan aki kompletamente. Tambe, OLB mester sòru pa un base legal kla pa futuro prosesamentu di dato personal. Den ambientenan di tèst por usá solamente dato anonimisá. Ademas semper mester hasi un DPIA na momentu ku ta trata di aplikashonnan digital ku ta prosesá dato personal.. Finalmente, OLB mester fortalesé su organisashon digital, por ehèmpel, dor di kuminsá traha segun e ‘Baseline Informatiebeveiliging Overheid (BIO).
CBP BES ta bai supervisá kumplimentu di e rekomendashonnan. E protekshon di dato personal ta un responsabilidat komun i un obligashon legal. Tambe den kaso di renobashon digital, ta importante pa hasi e eskoho den e kuadro di e lei. Siudadanonan mester por konfia ku ta trata nan datonan ku koutela i di forma legal. CBP BES ta sigui traha pa esaki.
E rapòrt kompleto di e investigashon ta disponibel via www.cbpbes.com.