Konseho di Minister awe a bai di akuerdo ku e proposishon di lei di Sekretario di Estado Van Marum (Asuntunan Interno i Relashonnan den Reino) pa oumentá e kantidat di miembro di konseho insular i diputado di Boneiru, Sint Eustatius i Saba di forma aselerá.
Den e proposishon di lei tin pará ku e kantidat di miembro di konseho insular lo subi un pia un pia na e próksimo elekshon di 17 di mart 2027. Na promé instansia, na Boneiru lo bai di 9 pa 11, pa Sint Eustatius di 5 pa 7 i pa Saba di 5 pa 7. A base di e proposishon, e kantidat di diputado tambe ta subi e ora ei: na Boneiru di 3 pa 4 i na Sint Eustatius i Saba di 2 pa 3.
Palabrashonnan
Ku e proposishon di lei aki lo ehekutá e palabrashonnan hasí durante e konferensia di trabou na komienso di mart 2024 tokante revishon di e Wet op de openbare lichamen Bonaire, Sint Eustatius en Saba (WolBES, Lei Entidatnan Públiko Boneiru, Sint Eustatius i Saba) i e Wet Financiën BES (FinBES, Lei Finansa BES). E leinan aki ta regla e relashonnan gubernamental i finansiero entre Boneiru, Sint Eustatius i Saba i Gobièrnu Sentral.
Krese huntu
Un di e konsiderashonnan pa e ekspanshon di e konseho- insular i kolegionan ehekutivo ta ku e kantidat di miembro di konseho insular i diputado for di 2010 no a krese huntu ku e kantidat di habitante. Ademas, for di e islanan a bini e señal ku e kantidat di diputado ta demasiado abou miéntras ku tin hopi trabou ku mester hasi. Ku e proposishon aki, ta kuminsá reakshoná riba e señal aki pa kontribuí na mas forsa ehekutivo i na fortifikashon di e demokrasia.
Sekretario di Estado van Marum: “E islanan ta pará dilanti di tareanan grandi. Pensa riba konstrukshon i mehorashon di kaya, bon enseñansa, realisashon di sufisiente bibienda, stimulashon di ekonomia i mehorashon di konektividat entre e islanan. Huntu ku e mandatarionan polítiko, nos ta kontinuá e kolaborashon di forma desididu pa ofresé perspektiva na e habitantenan. Ku ekspanshon i fortifikashon di e gobernashon na Boneiru, Sint Eustatius i Saba, mi ke aportá na esaki di forma aselerá.”
Sosten
E konsehonan insular i kolegionan ehekutivo ta haña sosten pa ehekutá nan trabounan bon. Ministerio di BZK a pone rekursonan disponibel pa esaki. Ademas, e mandatarionan polítiko di e islanan for di komienso di aña 2025 ta risibí sosten via e asina yamá programa di sosten.
Despues di e aprobashon den Konseho di Minister, e proposishon (proposishon di lei) ta bai Raad van State i despues Tweede Kamer pa konseho.