E di dos ronda di konsulta pa revishon di e Wet openbare lichamen Bonaire, Sint Eustatius en Saba (WolBES) i e Wet financiën openbare lichamen Bonaire, Sint Eustatius en Saba (FinBES) ta bai kuminsá pronto. Konseho di Minister awe a disidí, riba proposishon di Sekretario di Estado Eddie van Marum (Asuntunan Interno i Relashonnan den Reino) ku e ronda di konsulta por kuminsá.
E WolBES (Lei Entidatnan Públiko Boneiru, Sint Eustatius i Saba) i e FinBES (Lei Finansa Entidatnan Públiko Boneiru, Sint Eustatius i Saba) ta tokante gobernashon di Boneiru, Sint Eustatius i Saba. E leinan aki tambe ta duna kuadronan ku ta yuda pèrkurá pa bon gobernashon i finansa di gobièrnu sólido. ‘Checks and balances’ (kontròl i balansa) tambe ta parti di esaki, manera e kontròl dor di Konseho Insular, un Kámara di Kontrolaria lokal, i e Representante di Reino. Esaki ta kontribuí na mihó servisio na habitante-, empresario-, i organisashonnan sosial.
Esaki ta e di dos konsulta via internèt pa e Herzieningswet WolBES-FinBES (Lei di Revishon WolBES-FinBES). Un di dos ronda di konsulta ta nesesario, pasobra tin kambio kompará ku e vershon di konsulta anterior. E ronda di konsulta ta dura 8 siman.
Kambio den e funshon di Representante di Reino
Den e vershon anterior di e Herzieningswet WolBES-FinBES (Lei di Revishon WolBES-FinBES), a skrap e funshon di Representante di Reino. Awor ta konservá e funshon. Esaki ta forma parti di e konsulta.
Kuadronan finansiero
Pa duna Boneiru, Sint Eustatius i Saba mas posibilidat pa ehekutá nan tareanan di forma adekuá, e proposishon ta pa amplia e posibilidatnan di gobièrnu di e islanan pa buska fiansa. Meskos ku munisipionan, Boneiru, Sint Eustatius i Saba por bai sera fiansa serka bankonan. Esei ta posibel solamente pa ehekushon di tareanan insular, por ehèmpel pa konstrukshon di bibienda sosial, mihó kayanan, i mihó suministro di energia. Lo pone kondishonnan pa e fiansa. Tambe lo tin supervishon riba e fiansa dor di e islanan. Asina lo limitá e riesgonan finansiero.
Durante di e ronda di konsulta ta duna tur hende oportunidat pa duna su opinion. Tambe e sekretario di estado ta bai den diálogo ku e kolegionan ehekutivo tokante di e proposishonnan di lei.
Entrante otro siman por haña e konsulta riba internèt via e lenk aki: https://internetconsultatie.nl/