Gabinete ta trahando riba bon gobernashon i un estado di derecho fuerte na tantu e parti oropeo komo e parti karibense di Hulanda. Sekretario di estado Eddie van Marum (Asuntunan Interno i Relashonnan den Reino) pa e motibu ei ta manda e Agènda di Bon Gobernashon Hulanda Karibense awe pa Tweede Kamer. E Agènda di Bon Gobernashon ta enfoká riba tres prioridat. Un gobièrnu fuerte i mihó servisio na siudadano i empresa. Institutonnan fuerte ku ta pèrkurá pa kuadronan i supervishon legal i komprendibel. I atendé ku violashon di integridat i amplia resistensia di e estado di derecho.
Sekretario di estado Van Marum: “Den henter Hulanda habitantenan mester por konfia riba un gobièrnu ku ta funshoná bon i íntegro. Ku e Agènda di Bon Gobernashon, den kolaborashon ku gobernantenan di Boneiru, Sint Eustatius i Saba, mi ta duna un impulso importante pa sigui promové bon gobernashon. Nos ta sigui traha riba e esfuersonan di último tempu. Habitantenan mester por konfia ku gobièrnu lokal ta respetá i mantené lei. Den e sentido aki mi ta haña importante ku habitantenan por ekspresá nan mes i ku gobièrnu tin bista pa interes i preokupashon di hende.”
Kolaborashon estrecho
Ta realisá e Agènda di Bon Gobernashon den estrecho kolaborashon ku e gobièrnunan insular di Boneiru, Sint Eustatius i Saba. Den esaki ta eksistí un responsabilidat kompartí entre e gobièrnunan tur tres isla i Gobièrnu Sentral. Riba tur tres isla ta traha bou di guia di e gezaghèbernan riba un aserkamentu insular pa fortifiká gobernashon. Ta importante pa e ta un aserkamentu konkreto, ku ta konektá ku e nesesidatnan lokal. Ehèmpelnan di pasonan konkreto ku ya a tuma kaba ta, establesimentu di ofisina di integridat i medidanan pa mehorá maneho finansiero.
Eskala chikitu i tarea kompleho
Gobernantenan na Hulanda Karibense ta konfrontá retonan spesífiko. Por ehèmpel e islanan ta chikitu, pero e tarea- i enkargonan ta grandi i kompleho. Riba tur tres isla tin vulnerabilidat riba tereno di bon gobernashon. Por ehèmpel por papia di falta di kapasidat i posishon di instituto- i órganonan di supervishon no ta fuerte. Tambe, kontrali na Hulanda Oropeo, ta karesé di legislashon importante riba tereno di bon gobernashon i integridat.
Fortifikashon di gobernashon i mihó servisio na siudadano
Un komponente importante di e Agènda di Bon Gobernashon ta mehorashon di e servisio na Boneiru, Sint Eustatius i Saba. Lo realisá esaki ku ayudo di digitalisashon. Por ehèmpel ta bai introdusí BSN i DigiD e aña akí riba e islanan. Tambe ta importante pa publiká aktivamente desishonnan gubernamental, di manera ku habitantenan sa kiko ta kiko.
Instituto fuerte i kuadro legal
Ta fortifiká e kuadronan legal na Boneiru, Sint Eustatius i Saba, ku komo punto di salida e prinsipio di ‘kumpli òf splika’. Un ehèmpel di esaki ta preparashon di un Lei General Derecho Atministrativo BES. Tambe lo formulá un Lei Promoshon di evaluashon di integridat di atministrashon públiko (Bibob) pa Boneiru, Sint Eustatius i Saba. Lo fortifiká institutonan manera kontrolaria general. Edukashon den siudadania mester stimulá konsiensia demokrátiko i partisipashon riba e isla. Tambe ta kontinuá ku profeshonalisashon di gobernantenan polítiko i e ámtenarnan haltu pa medio di asosiashonnan profeshonal.
Atendementu ku violashon di integridat i ampliashon di resistensia di e estado di derecho
Boneiru, Sint Eustatius i Saba ta ehekutá, ku sosten di ministerio di BZK, medidanan pa atendé ku violashon di integridat. Por ehèmpel ta intensifiká reglanan pa kompra i destaho. Tambe ta bai investigá kon por protehá reporteronan di violashon di integridat mas mihó. Ademas lo inkluí Boneiru, Sint Eustatius i Saba den e Mónitòr di Integridat i Siguridat ku ta hasi kada dos aña pa Hulanda Oropeo.