Na Liseo Boneriano e siman aki a tuma lugá e di dos akshon di e kampaña ‘For di Gara’. Aktornan a aserká alumnonan durante pousa ku un proposishon ku tabata parse inosente. Un ratu despues a sali na kla: e tabata un aktuashon. E mensahe? Asina fásil eksplotashon kriminal por kuminsá.
‘Influencernan’ lokal, Servisio di Inmigrashon i Naturalisashon Hulanda Karibense (IND CN) , KPCN, KMar i Regionaal Informatie- en Expertisecentrum Caribisch Nederland (RIEC CN) a repartí pamflèt i a drenta den kombersashon ku e hóbennan. E kampaña ‘For di Gara’ ta dirigí na hubentut na Boneiru, Sint Eustatius i Saba i ta pidi atenshon pa e problema kresiente di eksplotashon kriminal. E kampaña ‘For di Gara’ ta dirigí na hubentut na Boneiru, Sint Eustatius i Saba i ta pidi atenshon pa e problema kresiente di eksplotashon kriminal.
Mayor- i maestronan: keda alerta
Eksplotashon kriminal ta un forma silensioso di trabou hubenil moderno. No ta aserká hubentut ku violensia, sino ku preshon òf tentashon. I unabes ku nan ta pegá den e ret ei, no tin un salida fásil
Paga tinu riba señal manera: komportashon sekreto, plaka lihé òf regalo, diripente amigunan di mas edat, òf preshon konstante via mensahe di app. Si tin duda, esei ya ta sufisiente pa hasi algu: papia ku un mèntòr, hasi mas pregunta òf mèldu bo preokupashon anónimo.
Tuma responsabilidat huntu
“Nos mester siña hubentut ku nan por bisa nò, tambe ora algu ta parse inosente,” segun Junny Lopez, kabes di RIEC CN, i Sylvester Dieteren, kordinadó di kadena di estranhero di Servisio di IND CN. Skolnan tin un ròl klave aden, pero mayor- i coachnan tambe. Solamente si tur hende keda alerta, nos por mantené hubentut for di gara di kriminalnan.”
Pakete di skol pa 2026
E akshonnan ta mustra kon importante ta ku hubentut por rekonosé e señalnan na tempu. Pa e motibu ei, for di 2026 lo tin un pakete di skol disponibel pa tur skol. E ta kuminsá kaba den grupo 8, pa alumnonan por bai skol sekundario mas konsiente i resiliente. E pakete ta kontené tareanan kòrtiku, ehèmpel i tep pa diskushon den klas.
Kampaña ‘For di Gara’ ta parti di Programa Anual kontra Trafikashon di Hende 2025 i ta realisá den kolaborashon ku Ministerio di Hustisia i Seguridat, Servisio di IND CN RIEC CN, huntu ku skol- i organisashonnan di yudansa.