Despues di Tweede Kamer, Eerste Kamer tambe a duna lus bèrdè pa introdukshon di e number di servisio pa siudadano (BSN) i servisio gubernamental digital na Boneiru, Sint Eustatius i Saba. Esaki ta nifiká ku entrante 11 di novèmber 2025 e departamentu di registro sivil di e tres islanan por entregá BSN na nan habitantenan i habitantenan por pasa buska nan karta di BSN personal durante e simannan pa pasa buska e BSN. Despues ku e simannan pa pasa buska finalisá, semper por pidi BSN na e departamentu di registro sivil. Habitantenan ku ya tin un BSN kaba, ta keda ku e mes number i por pasa buska un karta tambe.
Sekretario di estado Van Marum: “Ku esaki a bolbe dal un paso importante na kaminda pa un servisio ekivalente pa habitantenan di Boneiru, Sint Eustatius i Saba. Ademas mi ta haña ku ta importante pa e siudadano ta bon na haltura di loke ku e posibilidatnan digital nobo ta nifiká pa nan. P’esei ta informá habitantenan di kiko e BSN ta i kon pa nan atendé ku esaki di un manera seif.Tur informashon ta multilingual i ta disponibel tantu ònlain komo òflain. Nos ta hasi tur posibel pa alkansá mas habitante posibel.”
Mihó servisio di gobièrnu
Introdukshon di BSN ta un promé paso pa hasi posibel ku habitantenan den futuro por hasi uzo di servisionan gubernamental ònlain. Ku e BSN tur habitante aweró tin un number personal úniko pa gobièrnu den su totalidat. Ku esaki por solisitá e dokumento di identifikashon di DigiD ònlain. Tambe organisashonnan gubernamental na Hulanda Karibense den futuro por bai hasi uzo di BSN i DigiD, asina nan sistemanan ta adaptá. Esaki den futuro ta permití habitantenan pa regla mas i mas asuntu ku gobièrnu ònlain ku un BSN i DigiD.
