Prosedura di keho nobo di KPCN pa trata keho na un manera kla i transparente
Kuerpo Polisial Hulanda Karibense (KPCN) entrante 1 di yanüari 2025 ta introdusí un prosedura di keho renobá ku ta fortalesé konfiansa entre siudadano i polis. Ku e prosedura aki e kuerpo ta aspirá pa yega na tratamentu di keho transparente i profeshonal, ku ta garantisá tantu interes di siudadano komo di kolaboradó polisial kuidadosamente .
E prosedura di keho renobá ta ofresé siudadanonan e posibilidat pa entregá keho di un manera strukturá i aksesibel. E prosedura ta konsistí di dos fase: un tratamentu informal via mediashon, i si ta nesesario, un tratamentu formal ku ta enbolbí un komishon di keho independiente.
Un aserkamentu nobo pa trato di keho
- Intake i Mediashon: Ta registrá un keho i papi’é ku e koordinadó di keho.
- Tratamentu di keho informal: Un kòmbersashon di mediashon entre esun ku ta entregá e keho i e kolaboradó(nan) di polis en kestion ta ofresé e chèns pa yega na un solushon i mas komprenshon di tur dos banda.
- Tratamentu di keho formal: Ora mediashon no ta sufisiente, un komishon di keho independiente, ku ta konsehá hefe di kuerpo, lo investigá e keho.
- Desishon i loke ta sigui: E hefe di kuerpo ta evaluá e keho i ta komuniká un desishon motivá ku tur esnan enbolbí.
Kiko esaki ta nifiká pa e kolaboradó polisial?
E prosedura di keho nobo ta ofresé kolaboradónan e posibilidat pa skucha nan den un ambiente seif i respetuoso. No ta mira keho komo un medio di kastigu, sino komo un instrumènt balioso pa mehorá e proseso laboral i konfirmá aktuashon profeshonal. Den kaso di un keho fundá lo wak kon por prevení situashonnan asina den futuro. Den kaso di un keho no fundá lo rekonosé aktuashon korekto di e kolaboradó, i e proseso ta ofresé esun ku ta entregá e keho mas komprenshon pa e trabou di polis.
Hefe di kuerpo, sr. Alwyn Braaf: “Keho ta ofresé un oportunidat importante pa siña i pa fortalesé e konfiansa entre siudadano i polis. E prosedura di keho renobá ta suprayá nos dedikashon na transparensia, profeshonalismo i mehorashon kontinuo di nos servisio. Nos ke demostrá nos siudadanonan ku nos ta skucha nan bos, miéntras ku na mes momentu nos ta sòru pa un trato honesto i respetuoso pa nos kolaboradónan.”
Importansia di e prosedura
E prosedura di keho no solamente ta dirigí riba solushon di insidente, sino tambe riba oumento di komprenshon mutuo i uso di keho komo oportunidat pa siña. Esaki ta kontribuí na un kalidat mas haltu di e aktuashon polisial i fortalesimentu di e konfiansa den e organisashon polisial.
Mas informashon i entrega di keho
Siudadanonan por entregá nan keho via e formulario digital riba wèpsait di KPCN. Por haña mas informashon tokante e prosedura aki.
Ku e prosedura di keho renobá KPCN ta tuma un paso importante den profeshonalisashon mas aleu di e tratamentu keho, na benefisio di tantu siudadano komo kolaboradó.
Kontakto ku Kuerpo Polisial Hulanda Karibense
Numbernan di telefon ku ta bon pa sa, ki ora ta yama kua number?
Ora kada sekònde ta konta: number di emergensia 911 òf 112 (grátis)
Ora bo ke duna un tep (anónimo): Liña di tep (+599) 9310
Number di warda di polis riba bo isla, ora ku no ta trata di un emergensia:
Bonaire (+599) 715 8000 of 717 8000
Saba (+599) 416 3737
Statia (+599) 318 2333