A resolvé e promé problemanan di urgensia na Selibon
A remediá e promé situashon di urgensia rondó di seguridat i almasenamentu seif di sushi na Selibon. A hasi reparashon di e kònteinernan ku ta kontené sushi di asbèst. Tambe a haña un solushon pa sushi biomédiko nobo. Ta prosesá e sobrá di karni di matadero segun e reglanan korekto. E kurá pa e sentro di sushi ta kla. Por último a hasi e seguridat na e sentro di sushi mas severo.
Medio novèmber Representante di Reino interino (wRv) a tuma lugá di Kolegio Ehekutivo pa motibu di e situashon preokupante, kompliká i urgente na Selibon Lagun.
Despues di esaki a tuma akshon rápido pa remediá e problemanan mas prinsipal i práktiko na e sentro di sushi.
Sushi ku ta kontené asbèst
A hasi reparashon di e 19 kònteinernan kibrá ku ta kontené sushi di asbèst segun planifikashon. Nan ta stashoná riba un tereno será i ta sigurá ku kandal. Ta almasená sushi ku ta kontené material di asbèst temporalmente den kònteiner nobo, te na momentu ku haña un solushon struktural pa prosesá asbèst.Openbaar Lichaam Bonaire (OLB) den estrecho kolaborashon ku Selibon ta determiná e kantidat di kapasidat nesesario pa almasenahe di sushi ku ta kontené asbèst, pa motibu di responsabilidat di OLB pa maneho di e sushi riba termino largu.
Sobrá di karni di matadero
For di promé di yanüari 2025 instrukshon di trabou nobo ta na vigor pa prosesá sobrá di karni di matadero korektamente. Pa motibu ku e fòrnu pa kima sushi no ta den funshon, por dera e sobrá di karni. Esaki ta sosodé bou di reglanan estríkto pa e manera di paketá, e profundidat korekto, tapá, registrá i indiká e lugá riba e tereno.
Sushi biomédiko
Tambe ta bestèl dos (2) kònteiner di friu pa almasenahe di sushi biomédiko promé ku prosesá esaki. Lo pone e kònteinernan aki banda di e fòrnu pa kima sushi (deskonektá), riba un fundeshi di betòn (eksistente) i será den un kurá. Ta adaptá e instalashon di koriente pa suministrá e dos (2) konteinernan di friu ku koriente. Dependiente di e tempu di entrega di e konteinernan i kùrmentu di e instalashon (dor di WEB) lo por kuminsá hasi uso di e kònteinernan na fin di febrüari òf komienso di mart.
Na e momentunan aki ta investigá e posibilidatnan pa transporte i proseso di e nuebe (9) kònteinernan ku ta kontené sushi biomédiko sin fria. Transporte i prosesesamentu na Hulanda òf Aruba ta e opshonnan mas prometedor.
Seguridat
E vigilansia na i rondó di Selibon Lagun a bira mas estríkto 24/7 i lo keda asina. Banda di opservashon via di kámara i vigilansia e vigilantenan ta kontrolá na entrada tambe. E sentro di sushi kompleto (entre otro e sitio pa depositá sushi, lugá pa surti sushi, deposito di karton, instalashonnan pa kima sushi, e stashon pa zeta sushi i kolektá sushi kímiko) ta disponé di un kurá sólido. Rondó di e lèntfel tin kuater (4) entrada mas no ofisial. Aki lo pone porta di entrada.
Pèrmit
E Representante di Reino suplente (wRv) a kontratá un kompania di ingeneria hulandes renombrá pa sostené den e proseso i evaluashon i e petishon pa pèrmit di Selibon di 2022.