ZJCN i diputadonan a bishitá provedornan di kuido na Colombia
Pa sigui mehorá kuido pa pashèntnan di Boneiru, Sint Eustatius i Saba ku ta trasladá pa Colombia, Kuido i Hubentut Hulanda Karibense (ZJCN), parti di Ministerio di Salubridat, Bienestar i Deporte (VWS), a hasi un bishita di trabou pa Cali i Medellin. Diputadonan enkargá ku kuido riba e islanan tabata presente huntu ku algun atministradó di kaso di ZJCN. E último grupo a sigui ‘Masterclass’ di spesialistanan tokante kon pa mónitòr pashènt di un manera efisiente durante traslado médiko.
Diputadonan informá, Atministradónan di kaso di ZJCN entrená
E último añanan a introdusí hopi mehorashon den traslado médiko pa Colombia. Pa motibu ku hopi biaha diputadonan ta e promé punto di kontakto pa siudadanonan, tabata importante pa nan a forma parti di e biahe. Di e manera aki nan ta na altura di e último desaroyonan i nan por informá e siudadano mas mihó tokante un eventual traslado médiko. Pa e atministradónan di kaso tambe e biahe tabata balioso. Nan a bishitá e klínika kaminda ta yuda pashèntnan di Hulanda Karibense. Asina e atministradónan di kaso por guia i sostené e pashèntnan ku ta bai den eksterior mas mihó.
A optimalisá e servisio di kuido médiko na Colombia
E bishita di trabou na Colombia tabata parti di e mishon di ZJCN pa sòru pa kuido aksesibel, hustu i konfiabel pa tur hende na Hulanda Karibense. E último añanan a traha duru pa mehorá e kuido pa pashèntnan ku no por haña kuido médiko riba nan propio isla. A fortifiká e kolaborashon ku provedornan di kuido na Aruba, Sint Maarten, Colombia i Hulanda despues di e periodo di Covid-19 i e prosesonan rondó di e servisio ta mas efisiente. E konosementu i kontaktonan optené, ta kontribuí na un mehorashon mas aleu di e nivel di servisio di ZJCN.