Buska bo tarheta di seguro di kuido médiko na ofisina di ZJCN durante orarionan di konsulta sin sita
Kralendijk – Bo no a buska bo tarheta di seguro di kuido médiko ainda? Kuido i Hubentut Hulanda Karibense (ZJCN) ta invitá bo pa hasi esaki. E tarheta di seguro di kuido médiko ta destiná pa habitantenan di Hulanda Karibense ku ya ta dos aña kaba sigurá na ZJCN. E tarheta ta remplasá e prueba di seguro di papel i ta hasi e proseso di kuido mas simpel, partikularmente den kaso di asistensia médiko urgente den eksterior.
Pa fasilitá buskamentu di e tarheta di seguro di kuido médiko, bo por pasa awor durante nos orarionan fiho sin sita na ofisina di ZJCN, Kaya Grandi 91:
- Djaluna, djárason i djabièrnè: di 08 ’or di mainta te 12 ’or di mèrdia
- Djamars i djaweps: di 1 ’or di mèrdia te 4 ’or di atardi
Bo ta preferá tòg di traha un sita?
Ta posibel tambe pa traha un sita adelantá. Manda un meil na zorgpas@zorgverzekeringskantoor.nl i menshoná ei den bo nòmber kompletu, number di sédula i number di telefòn. Nos ta tuma kontakto mas pronto posibel ku bo pa plania un sita.
Kiko bo mester trese?
Pa buska bo tarheta di seguro di kuido médiko, bo tin mester di un par di dokumento. Bin ku bo sédula i un formulario di kliente yená. Bo ta haña e formulario akí riba www.zvkcn.nl òf na nos ofisina. Mayor- i mayornan di kriansa por buska e tarheta di seguro di kuido médiko di muchanan menor di edat; pa hasi esaki ta pèrmití tambe un pasport pa menornan di edat komo identifikashon.
Si bo no tin chèns pa bo mes pasa, un otro persona por buska e tarheta di seguro di kuido médiko den bo nòmber. Pa esaki e apoderado tin mester di e siguiente dokumentonan:
- Un formulario di apoderashon, firmá pa bo y e apoderado. Bo ta haña e formulario akí riba www.zvkcn.nl òf na nos ofisina.
- Bo sédula original.
- Dokumento di identifikashon di e apoderado.
Importante pa sa
E tarheta di seguro di kuido médiko no ta remplasá un seguro di biahe. P’esei no lubidá di sera un seguro di biahe adishonal ora bo ta biaha pa eksterior. Esaki ta pèrkurá pa bo ta kompletamente kubrí den kaso di emergensia médiko. Pa mas informashon bo por bishitá www.zvkcn.nl of tuma kontakto via zorgpas@zorgverzekeringskantoor.nl.