ACM: Ahuste tarifanan máksimo elektrisidat Hulanda Karibense entrante promé di yüli 2025
Autoriteit Consument & Markt (ACM, Outoridat Konsumidó & Merkado) a stipulá tarifanan máksimo nobo pa distribushon di elektrisidat na Hulanda Karibense. Un kas di famia promedio na Boneiru i Saba, dor di esaki, entrante promé di yüli 2025 lo paga mas o ménos 2 USD mas pa luna, i na Sint Eustatius mas o ménos 3 USD ménos pa luna. E kambionan ta konsekuensia di e preis di petrolio ku a subi respekto e balorashonnan ku ACM a hasi aña pasá den stipulashon di e tarifanan. Komo ku den e tempu ei no tabata posibel pa hasi balorashonnan asina di e mesun manera, na Boneiru i Saba ta surgi un korekshon asendente leve, i un korekshon hustamente desendiente leve na Sint Eustatius.
Kada aña, na desèmber ACM ta stipulá e tarifanan máksimo pa produkshon i distribushon di elektrisidat na Hulanda Karibense pa e aña nobo. A base di e tarifanan máksimo aki, suministradónan di energia ta stipulá e tarifanan máksimo ku nan ta kobra habitante- i empresanan. Pa por tene kuenta ku e preisnan variabel di kombustibel, ACM ta ahustá e tarifa variabel pa uso di elektrisidat entrante promé di yüli, si esei ta nesesario. Asina e tarifa básiko (vastrechttarief) máksimo no ta kambia.
Ministerio di Klima i Kresementu Bèrdè (Ministerie van Klimaat en Groene Groei) na 2025 ta supsidiá e gastunan pa maneho di e ret di elektrisidat (e tarifa básiko) sigun e nivel promedio hulandes oropeo. Ademas, for di e Ministerio di Asuntunan Interno i e Ministerio di Asuntunan Sosial i Empleo, tin un kompensashon di energia i un supsidio adishonal di forsa di kompra optenibel.
Boneiru
Pa Boneiru, e tarifa variabel máksimo di uso ta subi di 0,3136 USD/kWh pa 0,3220 USD/kWh. E tarifa máksimo di pagabon (prepago) ta subi di 0,6439 USD/kWh pa 0,6523 USD/kWh, promé ku aplikashon di supsidionan riba e tarifa básiko. Pa uso di un kas di famia promedio na Boneiru, esaki ta nifiká un subida di mas o ménos 2 USD pa luna.
Sint Eustatius
Pa Sint Eustatius, e tarifa variabel máksimo di uso ta baha di 0,2961 USD/kWh pa 0,2837 USD/kWh. Pa uso di un kas di famia promedio na Sint Eustatius, esaki ta nifiká un bahada di mas o ménos 3 USD pa luna.
Saba
Pa Saba, e tarifa variabel máksimo di uso ta subi di 0,3797 USD/kWh pa 0,3876 USD/kWh. Pa uso di un kas di famia promedio na Saba, esaki ta nifiká un subida di mas o ménos 2 USD pa luna.