Entrante 11 di ougùstùs por pidi supsidio pa inisiativa relashoná ku pasado di sklabitut
Pasado di sklabitut ta un parti doloroso, pero importante di nos historia komun. Durante hopi tempu e inhustisia aki a haña muchu poko atenshon, miéntras ku te ainda ta ripará su impakto. P’esei ta inisiá den ougùstùs 2025 un areglo di supsidio pa inisiativanan sosial relashoná ku pasado di sklabitut transatlántiko. Fundashonnan e ora ei por pidi supsidio pa proyektonan ku ta kontribuí na rekonosementu, rehabilitashon i konsientisashon. E areglo akí ta un di e akshonnan relashoná ku e diskulpanan pa pasado di sklabitut hulandes.
Awe a publiká e areglonan pa tantu Hulanda Oropeo komo e parti karibense di Reino.
Na 2023 ministerio di Asuntunan Interno i Relashonnan den Reino a organisá kòmbersashon- i diálogonan den henter Reino. A papia ku partisipantenan entre otro tokante struktura di e areglo di supsidio. E kòmbersashonnan akí a suprayá un biaha mas kon e efekto di sklabitut te ku dia di awe ainda ta kousa desigualdat, entre kultura- i komunidatnan.
A tene kuenta ku input di e kòmbersashonnan akí ora di formulá e areglonan di supsidio. Un punto importante tabata, ku e areglo mester ta aksesibel, pa organisashonnan chikitu tambe. P’esei deliberadamente a tene e prosedura di aplikashon simpel. Pa informá organisashonnan adekuadamente ta organisá enkuentronan di informashon na Hulanda Oropeo i e parti karibense di Reino.
Preparashon i ehekushon bon prepará
Pa hinka e areglo den otro mester tabata kuidadoso. Mester a haña un organisashon di ehekushon ku eksperensia den traha ku areglonan di supsidio pa e komunidatnan embolbí. Entretantu ta evidente ku Uitvoering Van Beleid, parti di Ministerio di Asuntunan Sosial i Empleo, ta bai ehekutá e areglo.
Minister Uitermark: "Ora ta trata di pasado di sklabitut, ta importante pa para ketu na e pasado, pero pa wak tambe padilanti. P’esei mi ta kontentu ku despues di un periodo di hopi kòmbersashon i trabou, nos por inougurá e areglo. Un areglo ku ta aksesibel, realisá huntu ku komunidat, pa kua deliberadamente a invertí hopi tempu aden. Ta importante pa krea konsiensia kolektivo tokante pasado di sklabitut, pa nos para ketu na kon nos ta anda kuné den presente i traha riba un futuro komun.”
Ocho tanda di aplikashon ku kuater diferente supsidio
E promé tanda di aplikashon ta inisiá riba 11 di ougùstùs 2025. E ora ei fundashonnan por pidi supsidio pa fortifiká i profeshonalisá nan organisashon. €5.000 pa organisashonnan na Hulanda Oropeo i USD 10.000 pa organisashonnan den e parti karibense di Reino. E areglo ta na vigor te ku 2028 i ta konsistí di ocho tanda di aplikashon pa kuater diferente supsidio.
Entrante e di dos tanda, fundashonnan por pidi supsidio tambe pa proyekto chikitu ku ta kontribuí na:
- atkisishon di mihó konosementu di efekto di pasado di sklabitut i kombatimentu di e konsekuensianan di e efekto di sklabitut den presente;
- prosesamentu di pasado di sklabitut;
- promoshon di konosementu i konsiensia tokante pasado di sklabitut; òf
- rekonosementu i konmemorashon di e pasado di sklabitut.
Sürnam
Pa Sürnam e areglo ainda ta den preparashon. Ta hasiendo esfuerso pa haña un partner di ehekushon pa e areglo. Asina ku publiká e areglo, ta anunsiá esaki riba rijksoverheid.nl..
Di diskulpa pa akshon
E areglo di supsidio akí ta un di pasonan ku ta surgi for di diskulpanan pa e pasado di sklabitut, ku gabinete a ekspresá riba 19 di desèmber 2022. Gabinete e tempu ei a pone €200 mion disponibel pa inisiativanan relashoná ku rekonosimentu, konsientisashon i rekuperashon. Di esei €100 mion ta destiná pa medidanan gubernamental pa stimulá konsiensia, rekonosimentu i prosesamentu. Por pensa riba kambionan den enseñansa básiko i sekundario, mas investigashon, museonan i protekshon di patrimonio kultural den tur e paisnan embolbí. E otro €100 mion ta pa inisiativanan salí di komunidat, e plaka ta repartí den tres: un terser parti ta destiná pa Hulanda Oropeo, un terser parti pa e parti karibense di Reino i un terser parti pa Sürnam.
Mas informashon
Por haña mas informashon tokante e areglo di supsidio i e enkuentronan di informashon planiá riba Subsidieregeling Maatschappelijke initiatieven trans-Atlantisch slavernijverleden voor het Caribisch deel van het Koninkrijk | Subsidie en regeling | Uitvoering Van Beleid.