Fleur Hermanides nombrá komo miembro nobo di Komishon di Programa Investigashon Karibense di NWO
NWO ta kontentu ku nombramentu di F.M. Hermanides, Msc, komo miembro nobo di Komishon di Programa Investigashon Karibense (PCCO). Ku su eksperensia amplio den region karibense riba tereno di salubridat públiko, konservashon di naturalesa, desaroyo sosial i investigashon sientífiko, Hermanides ta trese un kombinashon balioso di ekspertisio i embolbimentu kuné.
Fleur Hermanides a nase na Aruba i krese na Sint Maarten. Despues di su skol sekundario, el a optené su Master den Behaviour and Cognitive Neuroscience Research na Universidat di Groningen. Despues di kore stazje na un investigashon klíniko el a traha den kontròl di medisina, promé ku el a regresá Sint Maarten pa traha ei na Ministerio di Salubridat Públiko.
Banda di su trabou Hermanides a dediká su mes hopi aña komo boluntario na organisashonnan sosial i relashoná ku medio ambiente. Ademas e tabata kofundadó i mènedjer di proyekto di SXM DOET pa hopi aña, e inisiativa anual di boluntario. For di 2016 e ta kordinadó di proyekto di Samenwerkende Fondsen Cariben, ku ta sostené inisiativanan sosial na Sint Maarten, Saba i Sint Eustatius. Su embolbimentu na konservashon di naturalesa ta bisto entre otro for di su funshon komo presidente di fundashon EPIC (Environmental Protection in the Caribbean), i su funshon anterior den direktiva di Dutch Caribbean Nature Alliance (DCNA).
Ku su nombramentu komo miembro di PCCO, Hermanides lo kontribuí na fortifikashon di e konekshon entre siensia i komunidat na e parti karibense di Reino. “Ainda tin falta di investigashon relevante i dato kompartí , partikularmente na Sint Maarten”, segun Hermanides. “Ta un honor pa kontribuí na e desaroyo di konosementu duradero aki i impakto sosial riba e islanan pa medio di e funshon aki”.
NWO ta mira su nombramentu komo un paso importante den fortifikashon mas aleu di investigashon karibense.