Sinku empleado di Instituto Hudisial Hulanda Karibense (JICN) a partisipá ku éksito den e famoso Kaminata di Kuater Dia (Vierdaagse) na Hulanda, ku a tuma lugá di 15 te ku 18 di yüli 2025. Durante 4 dia nan a kana nada ménos ku 200 kilometer (tur dia kada un a kana 50 kilometer). E ta un prestashon impreshonante ku ta mustra kuantu preparashon, determinashon i esfuerso ta nesesario.
Zinnia Fecunda, Ellery Soliana, Juraindel Sambo, Candrick Balochie i Roy Burleson a prepará nan mes intensamente durante hopi luna pa e reto aki. For di komienso di e aña aki nan tabata trein regularmente huntu i individual na Boneiru. Esaki ta enserá lanta tempran, kana individualmente i huntu, pa desaroyá resistensia i forsa mental.
Riba djaluna 21 di yüli, e grupo a risibí un resepshon festivo i kaluroso na Boneiru. Ku orguyo koleganan i e direktor Peter Hengeveld tabata presente pa felisitá nan personalmente. Tabatin hopi apresio pa nan perseveransia i e echo ku nan tabata e promé grupo ku a partisipá na nòmber di JICN ku a bai pa e reto internashonal aki.
Ounke pa JICN ta e promé biaha ofisial, Boneiru ya konosé persona ku pa basta tempu a kana e ruta di kuater dia. Un ehèmpel ku ta inspirá ta Nazario Alberto, ku tabata traha hopi aña den seguridat na vários lokalidat di RCN. Riba e isla, e ta konosí komo kara di e Vierdaagse di Nijmegen, ku e a finalisá mas ku 15 biaha ku éksito. Su dedikashon i presensia pa añanan largu ta hasié un inspirashon pa hopi, tambe pa e generashon nobo di kanadó aki.
E sinku empleadonan aki ta pionero den JICN, pasó nan partisipashon ta pone e fundeshi pa futuro timnan for di Boneiru, Sint Eustatius i Saba. E meta pa 2026 ta pa motivá mas kolega pa tuma parti den e reto físiko i mental aki.
E kaminata di Kuater Dia di Nijmegen ta e evento di kana mas grandi na mundu, ku ta atraé míles di partisipante for di hopi pais. Ounke tur hende por partisipá, e kaminata mes ta pidi preparashon serio, bon kondishon físiko i determinashon firme.
Ku e logronan aki, e tim di JICN a demostrá ku bon preparashon, determinashon, retonan grandi tambe ta posibel.