CBP BES ta revoká sanshon atministrativo korektivo kontra Entidat Públiko Boneiru despues ku medidanan di privasidat a drecha demonstrablemente
Riba 7 di òktober 2024 Komishon supervishon protekshon datonan personal BES (CBP BES) a imponé un sanshon atministrativo korektivo (“last onder dwangsom”) riba kolegio ehekutivo di Entidat Públiko Boneiru (EPB). Tabata trata di un suma máksimo di $105.000, dividí riba medidanan di ‘clean desk’ i ‘clear screen’. A imponé e sanshon ku sanshon atministrativo korektivo pa motibu ku tabatin defisiensia struktural i kontinuo den kumplimentu ku e Lei di protekshon di datonan personal BES (Wbp BES). Por ehèmpel protekshon físiko di datonan personal no tabata sufisiente, komportashon di ‘clean desk’ tabata defisiente i tabatin rísikonan asosiá ku prentmentu sin supervishon.
Riba 5 di febrüari 2025, CBP BES den un desishon riba un opheshon a opiná ku e medida tabata hustifiká, pero a duna EPB un término di rekuperashon adaptá te 5 di mei 2025, ku un sanshon atministrativo korektivo mará na dje di USD 15.000.
Mehorashon i revokashon di e sanshon atministrativo korektivo
Basá riba e reportahe di progreso di EPB di 5 di mei 2025 i kontrolnan posterior riba 14 i 15 di mei 2025, CBP BES a determiná ku EPB a implementá pa gran parti e medidanan di rekuperashon. A limpia i sigurá lugánan di trabou, a introdusí e sistema di prent ‘follow-me’, a organisá e espasionan di archivo i a mehorá strukturalmente e noshon di privasidat. A base di e Lei general derecho atministrativo por revoká un sanshon atministrativo korektivo si e violashon a para. Ounke e Lei hurisdikshon atministrativo BES no ta proveé un stipulashon similar, Komishon ta konsiderá su mes kompetente pa hasi esei tambe. Komishon ta mira den loke tin ariba menshoná motibu pa revoká e desishon. EPB no tin mester di paga e sanshon atministrativo korektivo mas. CBP BES ta apresiá e esfuersonan di EPB i ta mira progreso evidente den protekshon físiko di datonan personal.
Supervishon, prevenshon i kontinuashon
CBP BES ta supervisá si ta kumpli ku e lei di privasidat na Boneiru, Sint Eustatius i Saba. Pa esaki por hasi uzo di diferente medida di mantenshon di lei, inkluso un sanshon atministrativo korektivo. E meta ta pa stimulá organisashonnan pa kumpli ku nan debernan legal i pa protehá datonan personal adekuadamente.