Enviado spesial Rijna presente na tòp di Association of Caribbean States
Cartagena – Enviado spesial di Boneiru, Sint Eustatius i Saba, Edison Rijna, a dirigí e delegashon hulandes ku a representá Boneiru, Sint Eustatius i Saba na di 30 reunion di konseho di ministernan di e Association of Caribbean States (ACS) na Cartagena, riba petishon di Ministerio di Asuntunan Eksterior. Reino hulandes ta miembro asosiá di ACS, meskos ku paisnan Aruba, Kòrsou i Sint Maarten. Hulanda ta miembro na nòmber di Boneiru, Sint Eustatius i Saba.
Ounke e ròl di miembro asosiá ta limitá (por ehèmpel, Reino no tin derecho di voto), e miembresia ta di balor stratégiko. Partisipashon ta duna posibilidat pa detektá desaroyonan regional na tempu, mantené relashon ku paisnan bisiña i profilá Reino, na nòmber di Boneiru, Sint Eustatius i Saba, manera un partner enbolbí den e área karibense.
“Durante e tòp, a trata vários ku ta relevante tambe pa e parti karibense di Reino, manera kambio di klima, sostenibilidat, turismo i e nesesidat pa mehorá konektividat den region. Tambe a papia tokante e posibel efektonan negativo di e polítika nobo di komèrsio di Merka i e importansia di kooperashon regional,” segun Enviado di BES Rijna.
“Nos a usa nos presensia prinsipalmente pa nètwèrk banda di e momentunan informal rònt di e seshonnan plenario. Nos a fortifiká lasonan eksistente i tambe a establesé kontakto nobo ku delegashonnan di paisnan ku por ta interesante pa Boneiru, Sint Eustatius i Saba den áreanan manera turismo i komèrsio. Pa e motibu aki tabata realmente balioso pa Reino ta presente na e evento aki.”
E Association of Caribbean States ta konsistí di 25 estadonan miembro, inkluso di isla chikí i pais grandi Latino-Amerikano manera Mexico i Colómbia, i adeas a konta tambe ku 10 miembro asosiá. Panama lo tene e presidensia di e konseho di minister di ACS pa e periodo 2025–2026.
