Inisio di konsulta via internèt riba reglanan pa pago bèk di plaka di malesa òf di aksidente ku a risibí indebidamente
Den e konsepto di dekreto kobransa di seguronan di trahadó BES tin reglanan tokante pago bèk di benefisionan ku a risibí indebidamente pa medio di e Lei seguro di malesa BES i Lei di seguro di aksidente BES. Tur hende por reakshoná awor pa medio di un konsulta riba e reglanan akí. E meta ta pa stipulá kuidadosamente i komprendibel, na ki momentu i kon por kobra e benefisionan akí bèk.
Regla pa pago bèk den kaso ku risibí benefisio indebidamente
Lei seguro di malesa BES i Lei di seguro di aksidente BES ta ofresé sosten finansiero na trahadónan na Boneiru, Sint Eustatius i Saba ku temporalmente òf permanentemente no por traha debí na malesa òf aksidente. Mayoria bia ta paga e benefisio na e dunadó di trabou. Te ku awor no tabata regla eksaktamente den lei, kon kobransa bèk mester a tuma lugá. Ku e Lei di kambio di leinan di SWZ BES 2024 a pone un base legal pa esei. Den e konsepto di dekreto ta spesifiká awor kon por regla e pago bèk den práktika.
E dekreto ta stipulá entre otro ku semper ta informá esnan enbolbí por eskrito, si mester paga bèk. Den e karta ei tin para e motibu, di ki montante ta trata i den ki término mester paga. Tin bia un persona no mester paga bèk, por ehèmpel si e montante ta abou òf si tin asuntu di sirkunstansianan partikular den e kaso individual. Unidat Asuntunan Sosial i Empleo (SZW) di RCN ta evaluá pa kada situashon si tin motibu pa legumai pago bèk (parsialmente). Tambe por deskontá e montante for di un futuro pago. Si no paga na tempu, por bin interes i gastunan adishonal aserka.
Aserkamentu kla
E reglanan ta kuadra ku areglonan eksistente na Hulanda Karibense. Asina ta bin un liña kla den e maneho di seguridat sosial. Unidat di SZW di RCN ta ehekutá e leinan akí i ta garantisá ku e dekreto akí, ku ta atendé pagonan ku a hasi indebidamente na un manera kla.
Ultimo posibilidat pa reakshoná
Promé ku stipulá e reglanan definitivamente, Gobièrnu Sentral ta organisá un último konsulta (ònlain). Tur hende ku kier yuda pensa, manera por ehèmpel dunadó- di trabou, empleado- òf personanan ku eksperensia práktiko, por reakshoná te ku 4 di yüli 2025, 11:59or di anochi via www.internetconsultatie.nl.
Espektativa ta ku e dekreto lo drenta na vigor pa mas tardá riba 1 di yanüari 2026.