A presentá establesimentu di e fundashon pa asistensia hurídiko i pa atendé ku diskriminashon na Hulanda Karibense na parlamento
Djabièrnè 6 di yüni konseho di minister a aprobá e proposishon di sekretario di estado demishonario pa Protekshon Legal i e minister demishonario di Asuntunan Interno i Relashonnan den Reino pa lanta un fundashon ku ta bai yuda siudadanonan gratuitamente ku problemanan hurídiko i diskriminashon.
Awor ta bai presentá e proposishon akí 30 dia na Eerste i Tweede Kamer. Ámbos por tuma nota di e intenshon i eventualmente hasi pregunta. Despues por establesé e fundashon na Boneiru.
Den preparashon pa establesé e fundashon, ta inisiá ku reklutashon di miembronan di e Konseho di Supervishon i e direktor-gerente. Despues di establesé e fundashon, lo kuminsá ku reklutashon di e kolaboradónan. Ademas lo buska lokalidat riba e tres islanan kaminda por habri porta pa siudadanonan.
Establesimentu di e fundashon ta un paso importante pa mehorá protekshon hurídiko di siudadanonan na Hulanda Karibense. Despues habitantenan riba tur e tres islanan por akudí gratuitamente na e fundashon ku pregunta hurídiko òf problema riba diferente tópiko, inkluso tambe kehonan tokante trato desigual. Na e momentunan akí ta trata e proposishon di lei ku ta hasi e leinan di trato igual aplikabel na Hulanda Karibense den Eerste Kamer. E kolaboradónan di e lokèt lo duna sosten apropiá dirigí riba solushon di problema.
Konseho insular di Boneiru resientemente a disidí pa lanta un Ofisina di Derecho Sivil. E medida akí tambe ta duna sosten hurídiko na siudadanonan i ta dirigí spesífikamente riba disputanan entre siudadano i gobièrnu. Tin kontakto estrecho ku entidat públiko Boneiru pa garantisá ku ámbos fundashon na Boneiru ta konektá bon ku otro i ta komplementá otro.