Diputadonan di kuido di salú i ZJCN ta fortifiká kolaborashon ku hòspitalnan regional
Bonaire – Diputadonan responsabel pa kuido di salú na Boneiru, Sint Eustatius i Saba huntu ku Kuido i Hubentut Hulanda Karibense (ZJCN), a realisá un bishita di trabou na e hòspitalnan sosio na Sint Maarten (SMMC), Kòrsou (CMC), Aruba (HOH i IMSAN) i Boneiru (FM). E bishita di trabou akí ta un siguiente paso pa mehorá aksesibilidat i kalidat di kuido na Hulanda Karibense.
Atkerí konosementu i kompartí preokupashon
Meta di e bishita tabata pa duna e diputadonan un bista kon den práktika ta duna kuido di salú na pashèntnan sigurá riba e islanan. E hòspitalnan a duna presentashon di mehorashonnan resien, desaroyonan stratégiko i a identifiká retonan eksistente – hopi biaha relashoná ku demografia i e konteksto kultural regional. Tambe e diputadonan a pidi atenshon pa preokupashon di pashènt- i profeshonalnan di kuido di salú di nan komunidatnan na kas.
Yamada pa embolbí pashènt aktivamente
ZJCN a enfatisá importansia di embolbimentu aktivo di pashènt den mehorashon di kuido di salú. Kada hòspital ta disponé di un funshonario di keho, i uzo adekuado di proseduranan di keho ta yuda pa señalá puntonan problemátiko i drecha kuido. ZJCN ta hasi un yamada riba pashèntnan pa hasi uzo aktivamente di e posibilidatnan akí.
Traha huntu riba mihó kuido
No opstante retonan konosí, e bishita a konfirmá e kompromiso kompartí pa fortifiká kuido médiko pa habitantenan di Boneiru, Sint Eustatius i Saba. ZJCN i e diputadonan ta gradisí tur e hòspitalnan sosio pa nan transparensia i kolaborashon i ta spera ansiosamente riba e proyekto konhunto di kontinuashon.