Traha huntu pa un futuro sin violensia doméstiko i violensia kontra hende muhé; konferensia di trabou No Mas No More na Sint Maarten
Di 16 pa 19 di yüni, e di sinku edishon di e konferensia No Mas No More a tuma lugá na Sint Maarten. Durante e reunion aki profeshonalnan di tur seis isla di e parti karibense di Reino a bini huntu. Representantenan di Ministerio di Salubridat, Bienestar i Deporte (VWS), Enseñansa, Kultura i Siensia (OCW) i Hustisia i Seguridat (JenV) tambe tabata presente.
E mensahe sentral di e konferensia di trabou tabata kla: ta importante pa nos traha huntu na ratifikashon di e Tratado di Istanbul. Un tratado internashonal ku tin komo meta pa prevení i kombatí violensia kontra hende muhé i violensia doméstiko.
Durante di e konferensia di trabou a traha riba plan di akshon riba seis tereno: igualdat di género, òrdu di protekshon temporal i métodonan di “time-out”, salú mental relashoná ku violensia doméstiko, kambio di komportashon komo parti di kampañanan di konsientisashon, kolekshon di dato i asistensia na personanan indokumentá den situashon di violensia doméstiko. E temanan aki ta direktamente mará na vários artíkulo di e Tratado di Istanbul.
Tambe a inkorporá e puntonan klave di e MoU ku e islanan a firma durante di e último konferensia di No Mas No More, den e plannan di akshon. Ta trata di e siguiente temanan: kolaborashon den Reino entre shèltèrnan pa víktima, kódigo di protekshon, investigashon, konsientisashon, kompartí konosementu i desaroyo di ekspertisio.
"E tema di e konferensia aki ta mas ku un lema—e ta representá un kompromiso balente kambio real i tangibel. E enkuentro aki no ta djis tokante kada ken su presensia; kada partisipante a kontribuí na un mensahe poderoso di resolushon kolektivo. No Mas, No More, Ni Aki, Ni Niun Kaminda,” asina Minister di Salubridat Públiko, Desaroyo Sosial i Labor di Sint Maarten, sr. Richenel Brug, a bisa.
E grupo di trabou No Mas No More, ku ta konsistí di miembronan di tur seis isla i di Ministerio di Salubridat, Bienestar i Deporte, ta mira atras riba un konferensia eksitoso. Tabatin hopi espasio pa kompartí konosementu, eksperensia i idea. E partisipantenan ta bai bèk nan isla ku un vishon nobo i plannan konkreto pa huntu ku partnernan di kadena den e kadena di hustisia i siguridat, sigui traha riba un futuro seif pa tur hende.