Investigashon tokante areglo di kompensashon pa yu na Hulanda Karibense: e areglo ta ampliamente usá i apresiá
Hopi mayor na Boneiru, Sint Eustatius i Saba ta eksperensiá e areglo di kompensashon pa yu (KBV BES) komo un aporte balioso pa kosto di bida di nan yunan. Esaki ta sali na kla for di investigashon tokante uzo i funshonamentu di e areglo. Mayornan ta duna di konosé ku e kompensashon ta yuda den gastu diario, i ku nan ta eksperensiá su ehekushon di parti di e unidat di SZW di Rijksdienst Caribisch Nederland (RCN) komo aksesibel.
E areglo di kompensashon pa yu, for di 2016 ta un parti fiho di e sistema di siguridat sosial na Hulanda Karibense. Tur mayor por risibí e kompensashon akí, sin importá nan entrada. E investigashon ta demonstrá ku e areglo ta ampliamente konosí i ta hopi usá. Organisashonnan sosial tambe ta suprayá importansia di kompensashon pa yu komo areglo básiko pa famianan.
Kòmbersashon ku mayornan i análisis di dato
A ehekutá e investigashon riba enkargo di ministerio di Asuntunan Sosial i Empleo. E investigadónan a kòmbersá ku mayor-, organisashon- sosial, ehekutor- i otro partidonan enbolbí riba e tres islanan. A komplementá konosementu kualitativo ku análisis basá riba sifranan di entre otro CBS i dato di Nibud, dirigí riba e gastunan real pa mucha i den ki grado e areglo ta alkansá pa kubri esakinan.
Bon base, ku atenshon pa situashonnan spesífiko
Na mes momentu e investigashon ta mustra ku e kompensashon aktual no ta sufisiente den tur situashon familiar. Partikularmente famianan grandi òf famianan ku tin yu mas grandi ta eksperensiá ku e kompensashon pa yu no tur ora ta kuadra sufisientemente ku e gastunan real. Tambe ta resultá ku sierto grupo, manera mayornan ku resientemente a bin biba riba e islanan, ta hasi uzo ménos frekuente di e areglo. Barera di idioma i konosementu limitá di areglonan gubernamental posiblemente ta hunga un ròl den esei.
Entretantu a presentá rapòrt di e investigashon na Tweede Kamer i e ta forma input pa e evaluashon mas amplio di maneho di e areglonan pa yu na Hulanda Oropeo i Karibense, ku ta spera den otoño di e aña akí. Den e kuadro ei ta investigá opshonnan pa un areglo ku ta dependé di e entrada. Ademas unidat SZW di RCN lo inkluí e rekomendashon di e rapòrt den su proseso aktual pa sigui mehorá servisio i aksesibilidat si areglonan sosial, kaminda esei ta posibel.
Por haña e rapòrt kompleto di e investigashon riba www.tweedekamer.nl/kamerstukken.