Miembro di komishon nobo pa CBP BES: Jolien Kuitert ta inisia entrante promé di aprel 2026

E ta sigui señor Jacques van Eck, ku despues di un aña komo ‘kwartiermaker’ i dos término kompletu, di total diesdos (12) aña, ta tuma despedida di e komishon. CBP BES ta masha agradesido na dje pa su añanan di esfuerso, dedikashon i su aporte balioso na protekshon di dato personal na Hulanda Karibense.  

Ku nombramentu di Jolien Kuitert, e komishon ta haña un profeshonal eksperensiá ku un trayektoria impreshonante tantu riba nivel nashonal komo internashonal. Durante su karera, el a okupá diferente funshon i ròl den e kadena hudisial, prinsipalmente Ministerio Públiko, kaminda pa hopi aña el a dediká su mes na koperashon (internashonal) kompleho i protekshon hurídiko. 

Su eksperensia amplio den kolaborashon internashonal, ‘governance’ i protekshon hurídiko ta hasi ku e ta un aporte balioso pa e komishon. E vishon stratégiko i eksperensia den práktika ku e tin, ta kuadra eksaktamente ku e retonan ku CBP BES ta enfrentá den un sosiedat ku kada bes ta bira mas digital.  

Den e próksimo seis añanan, e komishon lo traha huntu ku Jolien Kuitert ku e meta pa sigui mehorá protekshon di dato personal na e islanan BES.