Ministerio di Asuntunan Sosial i Labor (SZW) pronto lo publiká e proyekto di lei ‘Lei òmnibùs SZW’ 2027. Ta publiká e Lei òmnibùs SZW anualmente i e intenshon ta pa mantené i optimalisá legislashon. Den e proyekto di lei ‘Lei òmnibùs SZW’ a hasi tambe algun kambio ku ta relevante pa Hulanda Karibense. E konsulta pa medio di internèt pa e proyekto di lei a kuminsá i ta dura te ku 23 di aprel 2026, riba kua tur interesado por reakshoná.
E kambionan di mas importante pa Hulanda Karibense
E proyekto di lei Lei òmnibùs SZW 2027 ta kambia un kantidat di lei riba tereno di ministerio di SZW. E kambionan di mas importante ku ta spesífikamente relevante pa Hulanda Karibense ta konserní:
- Lei di labor 2000 BES
Riba petishon di entidat públiko Saba ta regla ku ta hasi un kambio den e dianan di fiesta ofishal den e proyekto di lei Lei òmnibùs SZW 2027. Ku esaki Saba ta entregá Djadumingu di Pentekòste i ta kambi’é pa Dia di Emansipashon.
Ademas for di awor kaba práktikamente por kuminsá selebrá 1 di yüli 2026 na Saba. Dunadónan di trabou i empleadonan ta liber pa hasi palabrashonnan tokante ferlòf riba e dia ei, ku òf sin retenshon di suèldu.
- Lei Akohida di mucha BES
E legislashon aktual ta brinda un base kaba pa apuntá ekspertonan independiente serka kende por denunsiá sospecho di echonan kastigabel den akohida di mucha, manera maltrato òf abuso. Loke falta ainda ta un base pa prosesamentu di datonan (partikular) entre e ekspertonan akí. Den e proyekto di lei Lei òmnibùs SZW 2027 ta regla e base akí.
- Lei medida di kompensashon pa yu BES
Den e areglo di ehekushon di kompensashon pa yu dòbel pa kuido intensivo BES ta apuntá tres (3) konsehero ku por duna minister konseho basá riba datonan médiko. Pa medio di un kambio tekstual den e lei, di awor pa dilanti por apuntá konseheronan tambe ku no tin personalidat hurídiko, manera kolegio ehekutivo.
- Kambionan redakshonal i korekshon di omishonnan
Ta hasi kambionan i ta koregí algun omishon den Kódigo Sivil BES, Lei Sesantia BES, Lei kontratonan laboral kolektivo BES, Lei Seguro di aksidente BES i e Lei seguro di enfermedat BES. E kambionan akí supstansialmente no tin impakto.
Konsulta pa medio di internèt
Ministerio di SZW ta duna hopi balor na partisipashon di interesado- i otronan embolbí pa realisá lei i regulashon. P’esei ta bin un konsulta pa medio di internèt pa e proyekto di lei Lei òmnibùs SZW 2027. Ta usa e input di esaki pa mehorá i komplementá e proyekto di lei kaminda ta nesesario.
Tur hende por reakshoná te ku 23 aprel 2026 (17:59 ora lokal) riba e konsulta pa medio di internèt akí pa medio di: Konsulta pa medio di internèt