Hulanda Karibense ta bai haña un areglo di supsidio piloto pa mantenshon di bibienda monumental. Na sèptèmber 2026, doñonan por apliká pa supsidio pa restorashon di nan monumento. E areglo tin un presupuesto di un biaha so di 1,1 mion dòler. E Fondo Nashonal di Restorashon (Nationaal Restauratiefonds) ta pone e sèn aki disponibel. E piloto aki ta pa haña eksperensia den práktika pa futuro maneho di monumento den e region. Awe a publiká e areglo den Korant di gobièrnu.
Minister Rianne Letschert (OCW): “Pa doñonan di bibienda monumental na Hulanda Karibense ta difísil pa haña finansiamentu, pa motibu di kua tin algun edifisio ku ta na peliger pa dekaí. Pa promé biaha, awor tin un supsidio ku ta bai direktamente pa doñonan na Boneiru, Sint Eustatius i Saba. Esei ta importante, pa motibu ku monumento ta konektá hende ku nan historia i nan kultura. Nan ta duna karakter na un sitio, i ta rekordá e habitantenan tokante ken nan ta i di unda nan ta bini.”
Na Hulanda Oropeo tabatin areglonan di supsidio kaba pa doñonan di monumento, pero na Hulanda Karibense ainda nò. I esei mientras ku e nesesidat pa esaki ta grandi na e islanan. Doñonan di monumentonan na Hulanda Karibense tin di haber ku gastunan haltu di mantenshon dor di e ubikashon di e isla, skarsedat di materialnan spesialisá i gastunan haltu di transporte.
Mantenshon grandi i restorashon
E Servisio di Reino pa Herensia Kultural (RCE, Rijksdienst voor het Cultureel Erfgoed) lo ehekutá e areglo di supsidio. E areglo ta orientá riba personanan privá ku ta doño di bibiendanan monumental ku tin mester di mantenshon (grandi) òf restorashon na Boneiru, Sint Eustatius i Saba. Pa bini na remarke pa supsidio, e gastunan pa konservashon mester ta mas haltu ku $25.000 i lo supsidiá esakinan te un suma di $100.000.
Monumentonan (históriko mas bieu ku 50 aña) sin un statùs protehá tambe ta bini na remarke pa supsidio. Ta trata di edifisionan ku ta di importansia general pa motibu di nan bunitesa, nan balor artístiko òf nan nifikashon históriko. Lo habri e areglo di promé te ku 30 di sèptèmber 2026. Solamente por apliká pa supsidio denter di e periodo aki.