Eric van der Burg, sekretario di estado di Asuntunan Interno i Relashonnan den Reino, ta sigui ku fortifikashon di e konsehonan insular pa medio di oumento di e kantidat di miembro di konseho insular i diputado, i ke pa e asina yamá ‘Verhogingswet’ drenta na vigor na tempu promé ku e elekshonnan pa konseho insular na mart 2027. Di e manera aki e habitantenan ta aún mas mihó representá den konseho insular. Banda di esaki, e kantidat di diputado ku tin aktualmente ta hopi abou pa e kantidat di trabou. E ‘Verhogingswet’ lo benefisiá e kapasidat ehekutivo di e islanan.
Ta trata aki di e oumento di kantidat di miembro di konseho insular i diputado na Boneiru, Sint Eustatius i Saba. Despues di finalisashon di e diferente pasonan ku a pone den e proposishon di lei, ta stipulá e kantidat di miembro di konseho insular i diputado a base di e kantidat di habitante, meskos ku den e parti Oropeo di Hulanda.
Programa di sosten
E periodo ku a pasa, sekretario di estado a papia ku e miembronan di konseho insular i kolegio ehekutivo di Boneiru, Sint Eustatius i Saba. For di e kombersashonnan a sali ku nan tin un aktitut positivo pa ku e ekspanshon. Sí nan a menshoná algun punto di atenshon, tokante por ehèmpel e sosten pa grifir- i konsehonan insular i gastunan di alohamentu. Sekretario di estado tin komprenshon pa esaki i ta keda den kombersashon ku e gobièrnunan di e islanan den e tempu nos dilanti.
Sekretario di estado Van der Burg ta bai sigui ku ehekushon di e medidanan di sosten ku a palabrá na De Bilt. Asina ta ku dentro di poko ta inisiá un programa pa polítiko-aspirante via di ProDemos i ‘Netherlands Institute for Multiparty Democracy’ (NIMD) na Boneiru, Sint Eustatius i Saba, pa informá i entusiasmá nan pa lokalmente bira polítikamente aktivo. Sekretario di estado ta dispuesto na kompensá e gobièrnunan pa e konsekuensianan finansiero ku e proposishon di lei aki tin pa e alohamentu.
E intenshon di sekretario di estado pa sigui ku e ‘Verhogingswet’ ta poné den e nota, komo resultado di e relato riba e ‘Verhogingswet’, ku riba 9 di aprel a manda pa e komishon di relashonnan den Reino den Tweede Kamer.