Dienst Uitvoering Onderwijs (DUO) ta amplia su servisionan eksistente den Caribe. Entrante e luna aki, e ofisina di servisio na Kòrsou ta ofresé e opshon pa yamada via video ku un empleado. Banda di esaki e e-learning pa futuro studiantenan, ku anteriormente a kuminsá na Kòrsou, awor tambe ta ser ofresé na skolnan na Aruba.
No tin diferensia di ora mas
Desde e periodo di COVID-19, DUO a ofresé e opshon pa yamada via video ku empleadonan na Hulanda. Studiante i eks studiante por a usa e servisio aki pa hasi pregunta tokante finansiamentu di estudio òf pagamentu di debe di studiante. Sinembargo, debí na e diferensia di ora entre Hulanda i Karibe, e kantidat di tempu disponibel tabata limitá.
Ku introdukshon di yamada di video via e ofisina di servisio na Kòrsou, e problema aki ta kos di pasado. Studiante i eks studiante awor por tuma kontakto ku un empleado di DUO mas fásil i na mas momento.
E servisio di yamada via video ta disponibel pa habitantenan di Aruba, Sint Maarten, i Hulanda Karibense. Studiante i eks studiante na Kòrsou tambe por hasi uso di e servisio aki na momento ku un bishita na e ofisina di servisio no ta posibel. Por hasi yamada via video fásilmente via un lèptòp, tèblet òf telefòn selular.
Por programá sita pa yamada di video via www.duo.nl/cariben.
A ekspandé e-learning pa Aruba
Anteriormente e aña eskolar aki, mas ku 500 alumno di HAVO 4 i VWO 5 di tur skol sekundario na Kòrsou a hasi uso di e e-learning. Den e hèrmènt ònlain aki, nan ta siña tokante finansa di studiante, seguronan, rekargonan, bibienda i atministrashon finansiero, entre otro. Studiantenan ta indiká ku esaki a duna nan un mihó bista riba e asuntunan práktiko ku nan lo enfrentá na Hulanda.
Debí na e resultadonan positivo, awor ta ofresé e-learning tambe na Colegio Nigel Matthew i De Schakel na Aruba. Ademas ta investigá si por usa e material di enseñansa tambe na otro skolnan sekundario den Karibe.
DUO ta implementá lei i regulashonnan pa ministerio di OCW, entre otro, riba e áreanan di finansiamentu di institutonan edukativo, dunamentu i kobramentu di finansiamentu di studiante i kubrimentu di gastunan di skol, i maneho di e proseso di rekonosementu i legalisashon di diploma.