Riba djárason 22 di aprel ofisialmente a habri e stashon di satélite Galileo na Boneiru. Durante e enkuentro festivo a revelá ku a nombra e parke rònt di e stashon na e nòmber di Prinsès Amalia. E stashon ta e promé sistema di nabegashon di satélite Oropeo ku a konstruí riba un di e islanan Karibense Hulandes.
E stashon di satélite
E stashon, ku ta konsistí di tres antèna den forma di un skòter, ta situá riba tereno di WEB na Queen’s Highway na Boneiru, serka di e popular sitio di snòrkel i sambuyá 1000 Steps.
E stashon ta parti di e sistema di nabegashon di satélite Galileo, ku ta uza entre otro pa referensia di tempu i determinashon di posishon. E proyekto Galileo ta e proyekto espasial Oropeo mas grandi di tur tempu i ta mas eksakto ku GPS. Komishon Oropeo a skohe Boneiru komo sitio pa realisashon di un di e ‘Galileo Sensor Stations’ (GSS) aki, pa motibu di su ubikashon stratégiko den e region karibense.
Nòmber Real
Durante un enkuentro festivo a revelá nòmber nobo di e parke: Prinses Catharina-Amalia Space Innovation Park. Nombramentu di e sitio na e nòmber di ‘Prinses van Oranje’ ta mustra e importansia i balor stratégiko di e proyekto aki den Reino.
Oportunidat pa e region karibense
E nòmber nobo ta mustra ku e parke ta ofresé hopi oportunidat pa inovashon. E stashon ta un punto di salida pa kresementu di teknologia espasial den region i esaki ta brinda oportunidat na empresarionan. Nan por kuminsá negoshinan nobo (‘startups’) ku ta traha ku datonan di satélite.
Tambe e stashon ta ofresé oportunidat pa edukashon. Asina e hubentut lokal por prepará nan mes bon pa futuro ku programanan di lès. Por pensa riba lèsnan manera teknologia den espasio òf kon satélitenan ta manda mensahe.
E direktora general di Ministerio di Infrastruktura i Maneho di Awa, señora Afke van Rijn, ta enfatisá esaki:
“GSS ta hopi importante pa Boneiru. E no ta sòru solamente pa mas trabou i turismo, e ta bon tambe pa siensia i téknika riba e isla. Ademas e ta trese idea nobo i inovashon na Boneiru.”