E seis islanan karibense ta enfrentá retonan urgente pa salbaguardiá kresementu ekonómiko i prosperidat amplio pa futuro. Pa mehorá e seguridat di eksistensia, krese ekonomia i fortifiká e posishon di e islanan den region, gabinete ta kuminsá traha pues riba tres prioridat. Sekretario di Estado, Eric van der Burg ta skirbi esaki den e Karta di Maneho pa Relashonnan di Reino. Sekretario di Estado, Van der Burg:
“Habitante- i empresarionan mester por konta ku un gobièrnu ku ta logra resultado i tuma pasonan konkreto ku ta notabel den nan bida diario. Esaki ta e punto di salida ku ta guia e ehekushon di e akuerdo di goberashon pa e parti karibense di Reino. For di Den Haag, nos ta komprometé, huntu ku e pais- i islanan, pa logra resultadonan visibel pa e residentenan. Maneho nobo na Hulanda Oropeo ta ser implementá básikamente na Boneiru, Sint Eustatius i Saba, a ménos ku tin motibunan krusial pa no hasi esaki. Di e forma aki, nos ta sigurá ku nos ta bai dilanti den Reino.”
Prioridat 1: Konstruí gobernashon rápido ku ta duna resultado
Huntu ku Boneiru, Sint Eustatius i Saba, gabinete aki ta komprometé na fortifiká atministrashon públiko: un gobièrnu efektivo i étiko i kuadronan hurídiko evidente. Ta konstruí riba e akshonnan ku a inisiá ku e Agènda di Bon Gobernashon Hulanda Karibense, e revishon di e Leinan di WolBES i FinBes, i e Lei di oumento di Konsehonan Insular. Pa yuda prevení situashonnan preokupante manera e kaso di Selibon, gabinete ta fortifiká ehekushon i kapasidat atministrativo. Gabinete ta sigui atendé violashon di integridat, pa motibu ku un atministrashon íntegro i fuerte ta e fundeshi pa konfiansa den gobièrnu. Por ehèmpel, Boneiru, Sint Eustatius i Saba ta partisipá den e Mónitòr di Integridat i Seguridat entrante e aña aki. Servisio públiko na Hulanda Karibense ta ser mehorá mas ainda. E meta ta pa trese esakinan na un nivel ekivalente na esun di Hulanda Oropeo – ònlain, via telefòn i na bali.
Prioridat 2: Fortifiká resiliensia sosial i ekonómiko i desaroyo duradero
Gabinete ta sostené desaroyo ekonómiko i abilidat di e islanan. P’esei ta establesé e Plataforma di Kresementu Ekonómiko Karibense pa konektá inovashon, empresarionan i kapital riba e seis islanan i den region mihó ku otro. Banda di esaki lo habri e Instituto Nashonal di Invershon resien establesí pa e parti karibense di Reino. Ta hasi esaki den kolaborashon ku e Ministerionan di Relashonnan Eksterior, Asuntunan Ekonómiko i Finansas. Tambe lo krea un fondo pa duna empresarionan, manera kunukero- i piskadónan, akseso na finansiamentu pa por ehèmpel ekspandé nan negoshi. Pa atendé pobresa na Boneiru, Sint Eustatius i Saba mas mihó, gabinete ta pone €30 mion disponibel, di forma struktural, entrante 2027. E sèn aki ta destiná pa medidanan ku ta kontribuí na un nivel mínimo di bida habitabel i baha kosto di bida.
Prioridat 3: Kolaborashon efektivo denter di Reino
Si ta keda na gabinete, lo establesé un Konferensha di Reino pa usa e oportunidatnan pa kolaborashon ku Aruba, Kòrsou i Sint Maarten mas mihó i pa fortifiká esaki di forma struktural. Esaki mester bira un diálogo periódiko entre e kuater gobièrnunan den Reino. Durante e diálogo aki ta diskutí desaroyonan relevante, asuntu- i oportunidatnan pa kolaborashon den Reino. Por ehèmpel, desaroyonan geo-polítiko por ofresé oportunidatnan nobo pa kolaborashonnan regional, partikularmente den áreanan manera energia, komèrsio i logístika.
Gabinete lo sigui desaroyá e prioridatnan aki den e próksimo período, huntu ku e pais- i islanan.