Den kurá di e misa Sint-Ludovicus Bertrandus na Rincon, awe a tuma lugá e apertura ofisial di Misa di Rincon. Enkargá ku apertura di e lugá inklusivo di hunga i di enkuentro aki tabata e Minister di Kuido di Durashon Largu, Hubentut i Deporte (‘Minister van Langdurige Zorg, Jeugd en Sport’), Mirjam Sterk, i e Diputado di Komunidat & Kuido di Boneiru, Timoteo Silberie. E apertura ta e último kapítulo di un trayekto kaminda habitantenan, institutonan di kuido i bienestar, OLB i Jantje Beton a traha huntu estrechamente.
Un lugá pa tur hende, den kurason di komunidat
Misa di Rincon ta situá na un lugá spesial: den kurá di misa, den kurason di Rincon i direktamente banda di e akohida den dia pa grandinan Cocari i FKPD pa hendenan ku limitashon. Den e diseño a tene kuenta ku tur e gruponan di enfoke: muchanan, grandinan í hendenan ku limitashon.
"Mi dilanti mi por mira eksaktamente loke un komunidat tin mester: un lugá kaminda bo por ta huntu," e minister a bisa durante e apertura. "Kada mucha mester por partisipá. Sea ku bo tin un limitashon òf nò. Pa tur hende ta importante ku nan por hunga i move, haña amiguitunan òf amiguitanan. P’esei ta asina importante ku tin lugánan manera esun aki."
Mas ku un kurá di hunga: enkuentro entre generashonnan
Loke ta hasi Misa di Rincon diferente for di un kurá di hunga gewon, ta e poder di e enkuentro. Aki, e muchanan ta hunga banda di klientenan di Cocari òf FKPD. Un enrikesimentu pa tur esnan enbolbí, yòn òf di mas edat, ku òf sin limitashon.
"Esei ta e poder di e lugá aki: e ta trese hendenan huntu ku di otro manera kisas nunka lo a topa ku otro," e minister a bisa. "I esei ta un enrikesimentu pa e klientenan, pero pa e muchanan tambe ta konta meskos."
Komo e promé Bario Saludabel na Boneiru, Misa di Rincon ta mas ku un lugá di hunga. E ta un lugá kaminda hungamentu, moveshon i topa otro ta bini huntu. Di e forma ei, e lugá ta kontribuí direktamente na salú i bienestar di e habitantenan di Rincon.
Prinsesa Beatrix a pone e promé piedra
E apertura di awe tin un historia spesial kaba. Na novèmber 2025, Prinsès Beatrix a hasi un bishita di trabou na Boneiru i a pasa na Misa di Rincon tambe. El a papia ku muchanan i habitantenan di bario tokante e futuro lugá i a pone un ‘story tile’ di Jantje Beton den e pilar di e porta di entrada. Un momentu simbóliko ku a enfatisá e embolbimentu di komunidat ku e proyekto aki.
