Despues di un aña piloto eksitoso na 2025, e proyekto Famia Fuerte lo kontinuá na 2026. Famia Fuerte ta un proyekto den kua Mental Health Caribbean (MHC), Expertisecenter Onderwijs Zorg Bonaire (EOZ), Zorg en Jeugd Caribisch Nederland (ZJCN) i Sentro Akseso ta kolaborá.
Imágen: © ZJCN
E proyekto ta enfoká riba desaroyá un programa nobo di sosten pa famia na Boneiru ku ta konfrontá múltiple reto ku ta relashoná ku otro. A siña hopi tokante e aserkamentu aki durante e promé aña piloto, i e sosten ta mustra bon resultado.
E meta di Famia Fuerte ta pa fortifiká i sostené famianan pa asina e muchanan por keda biba na kas mas tantu posibel. Tambe e proyekto tin komo meta pa yuda mucha ku a ser saká for di kas regresá su kas na un manera sigur i stabil. E kolaboradónan di sosten ta traha di forma estrecho huntu i ta evaluá e nesesidatnan huntu ku e famia. Den e kaso aki ta usa konosementu di kuido di salú spiritual, enseñansa, kuido di hóben i trabou sosial, entre otro. E sosten ta práktiko, fleksibel, i hopi biaha ta tuma lugá na kas di e famianan, inkluso pafó di orario di ofisina.
E famianan ku ta partisipá na Famia Fuerte hopi biaha tin hopi desafio. “Na mes momento, nan tin e forsa i rekursonan pa sigui dilanti,” segun Jaco de Rapper, sientífiko di komportashon na ZJCN. Dor di traha huntu pa krea trankilidat mental, klaridat i solushonnan práktiko, ta kreá espasio pa kambio positivo. E promé aña piloto a mustra ku famianan ta bira mas aksesibel, ta haña mas konfiansa den e sosten ku nan ta risibí, i ta partisipá mas aktivamente.
Lider di proyekto Anouk van Wincoop ta mira e di dos aña piloto komo un siguiente paso importante. E organisashonnan embolbí ta sigui traha huntu pa sigui desaroyá i fortifiká e aserkamentu aki.
Ku Famia Fuerte, ta traha na Boneiru pa desaroyá un rango di servisio di sosten ku ta konektá ku e realidat diario di famianan. E di dos aña piloto ta ofresé oportunidat pa sigui desaroyá e aserkamentu aki, pa asina garantisá ku famianan por sigui konta ku sosten apropiá i efektivo den futuro.