Riba 5 di febrüari 2026, Sekretario di Estado Judith Tielen (Hubentut, Prevenshon i Deporte) a informá Tweede Kamer tokante e progreso den ratifikashon di e Tratado di Nashonnan Uni tokante Desabilidat i e Tratado di Istanbul pa Hulanda Karibense. Tur e dos tratadonan aki tin komo meta pa protehá derechonan fundamental: e Tratado di Nashonnan Uni tokante Desabilidat ta garantisá derecho igual i partisipashon pa personanan ku desabilidat, miéntras ku e Tratado di Istanbul ta trata violensia kontra hende muhé i violensia doméstiko.
E Gabinete ta tumando pasonan nobo pa trese e tratadonan aki na vigor na Boneiru, Sint Eustatius, i Saba tambe. Legislashon a ser kambia kaba, manera e Lei di Trato Igual i e reglanan pa sosten sosial. Ademas, un agènda di trabou di vários aña (2026 - 2030) ta ser desaroyá pa mehorá e aksesibilidat i partisipashon di personanan ku desabilidat.
Riba 9 di desèmber 2025, a firma un akuerdo atministrativo nobo entre e Ministerionan di VWS, JenV, OCW, SZW i BZK i e entidatnan públiko di Boneiru, Sint Eustatius i Saba pa e periodo 2026 -2029. E akuerdo aki ta enfoká riba seis ophetivo prinsipal, inkluyendo igualdat di género, mehorashon di detekshon di violensia, i sosten fuerte pa víktima. Ademas, ta trahando riba un amienda di lei pa permití òrdu di restrikshon temporal komo parti di e aserkamentu di lei penal pa violensia doméstiko.