CBP BES ta mira bèk riba un simposio eksitoso tokante data digital i privasidat den Reino

Durante e simposio, mandatarionan, supervisornan, trahadónan den maneho i profeshonalnan di diferente parti di Reino a bini huntu. Nan a drenta kombersashon ku otro tokante digitalisashon i protekshon di dato personal. Entre e presentenan tabata tei Gobernador di Kòrsou, su ekselensia Mauritsz de Kort, representantenan di parlamento di Kòrsou i Aleid Wolfsen, presidente di ‘Autoriteit Persoonsgegevens’.

Gezaghèber di Boneiru, John Soliano a habri e enkuentro. Den su diskurso di apertura, el a enfatisá riba importansia di un bon protekshon di dato personal i un gobièrnu digital outéntiko i seif pa Hulanda Karibense. El a indiká ku habitantenan mester por tin e konfiansa ku ta trata datonan personal ku koutela i di un manera seif.

Despues, Femke Becht, na nòmber di Ministerio di Hustisia i Seguridat, a para ketu na e tema i importansia di koperashon den Reino pa loke ta trata protekshon di data digital i privasidat.

Siguí pa, Aleid Wolfsen, presidente di ‘Autoriteit Persoonsgegevens’, Friederike van der Jagt, abogado di privasidat na Hunter Legal BV, Rik Bergman, presidente di ‘Integriteitskamer’ di Sint Maarten, Juri Nicolaas, direktor di ‘Veiligheidsdienst Aruba’, Curt Belfor, direktor di ‘Regulatory Authority Curaçao’, i Glenn Thodé, presidente di CBP BES, a duna nan aporte supstansial. For di un perspektiva hurídiko, outoritario i práktiko, nan a elaborá riba e oportunidatnan i riskonan di digitalisashon i riba e responsabilidatnan di gobièrnunan i organisashonnan ora di uza datos personal.

E simposio tabata tambe den kuadro di despedida di señor Jacques van Eck, ‘kwartiermaker’ i miembro di e komishon. Ku apresio a para ketu na su dedikashon, konosementu i aporte importante na desaroyo i posishonamentu di CBP BES.

Riba djaweps 29 di yanüari 2026, a tuma lugá tayernan (workshops) tokante e diferente temanan. Durante e tayernan, partisipantenan a haña hèrmèntnan konkreto a base di ehèmpelnan práktiko pa apliká leinan di privasidat den nan trabou diario. E tayernan tabata bou di enkargo di:

• Tayer 1: Filtrashon di data (datalek): kiko awor? – Friederike van der Jagt
• Tayer 2: Privacy by design den empresanan chikitu – Paul Korremans
• Tayer 3: Resiliensia pa ‘cyber’ den práktika: Ser humano, Téknika i Komportashon – Carmen Graauwmans
• Tayer 4: Deklarashon di privasidat komo karchi di bishita – Ruud Hamers

Tayernan tabata bon bishitá i ku hopi entusiasmo. E forma interaktivo i ehèmpelnan práktiko a pèrkurá pa rekonosimentu i aplikabilidat direkto den práktika diario.

Durante e simposio a bini dilanti ku protekshon di dato personal den Reino mester di mehorashon. Manera:

• protekshon di dato personal den Hulanda Karibense aktualmente no ta sufisiente;
• diferensia den legislashon i supervishon den Reino por stroba koperashon i servisio;
• mas tardansa den modernisashon di legislashon i supervishon ta kousa rísiko pa siudadano i organisashonnan.

Den práktika, esaki por kondusí na e echo ku no ta protehá dato personal na e mesun manera tur kaminda den Reino. E kuestionnan aki no ta toka legislashon so, sino tambe gobernashon, servisio i e konfiansa di siudadanonan den gobièrnu.

E pregunta sentral ku a bin dilanti durante e simposio tabata: Kon nos ta pèrkurá pa dato personal den tur parti di Reino keda bon protehá i ku siudadanonan por konta ku un gobièrnu ku ta digitalmente seif i konfiabel?

CBP BES ta mira bèk riba un enkuentro balioso i ta enfatisá e importansia di koperashon duradero den Reino. Solamente dor di traha huntu, por fortifiká e protekshon di dato personal i por mantené e konfiansa di siudadanonan den servisio digital na un manera duradero.