Notisia17-02-2026 | 22:34

Na Hulanda Karibense (CN) aktualmente no tin benefisio sosial pa trahadó ku ta pèrdè su trabou. Komo preparashon pa un lei struktural di desempleo na Hulanda Karibense, Ministerio di Asuntunan Sosial i Empleo (SZW) ta traha aktualmente riba un Areglo Temporal di Benefisio sosial pa Desempleo BES (WV BES). Ku e Areglo Temporal WV BES akí lo duna benefisio sosial di por máksimo tres (3) luna pa trahadó na Hulanda Karibense ku ta bira desempleá sin ku e mes tin kulpa den esaki. Un konsulta via internèt tokante e konsepto di e Areglo Temporal WV BES akí lo kuminsá riba 17 di febrüari 2026, i tur ‘stakeholder’ por reakshoná.

Areglo Temporal WV BES

E Areglo Temporal WV BES ta konta pa tur trahadó na Boneiru, Sint Eustatius i Saba ku ta konsiderá segun e Lei di loonbelasting BES komo trahadó. Un eksepshon pa esaki ta bálido pa ámtenar den e sektor públiko. Pa nan ta konta e Desishon Wachtgeld ámtenar BES (Wachtgeldbesluit overheidsdienaren BES) i no e areglo nobo akí.

Ku benefisio sosial di e Areglo Temporal WV BES por yuda kubri e konsekuensianan di entrada agudo di desempleo. E rekisitonan pa bini na remarke ta:

  1. E trahadó mester a pèrdè su trabou (kompleto);
  2. E trahadó no tin mag di a pèrdè su trabou dor di ‘su mes kulpa’;
  3. E trahadó a traha por lo ménos un ora den 26 siman di kalènder den e 10 lunanan di kalènder promé ku e último dia di trabou.

Por entregá petishon pa un WV-uitkering na RCN-unidat SZW asina ku e areglo temporal drenta na vigor.

Konsulta via internèt

E Ministerio di SZW ta balorá e aporte di ‘stakeholder’ i otro persona embolbí den e desaroyo di legislashon i regulashon. P’esei, lo kuminsá un konsulta via internèt pa e Areglo Temporal WV BES riba17 di febrüari 2026. E konsulta via internèt akí lo dura te ku 17 mart. Lo usa e ‘input’ di e konsulta via internèt pa mehorá i suplementá e proposishon di lei kaminda ta nesesario.

Tur hende por reakshoná riba e konsulta via internèt di 17 di febrüari pa 17 di mart 2026 (18:59 orario lokal) via: https://www.internetconsultatie.nl/tijdelijkeregelingwerkloosheidsvoorzieningbes. 

Klek riba e lenk “Relevante documenten” pa un resúmen na Papiamentu i Ingles.