Dienst Uitvoering Onderwijs (DUO) ta bishitá e área karibense di 9 te ku 27 di mart. Durante e bishita DUO lo habri ofisina di servisio temporal i lo organisá enkuentro di informashon tokante finansiamentu di estudio. Ademas lo duna atenshon tambe na e hèrmènt nobo di Gobièrnu Sentral ku ta yuda studiante prepará su mes pa su biahe pa Hulanda.
Anualmente mas di 1.500 hóben di e área karibense ta kuminsá un estudio na Hulanda. Pa laga e transishon akí kana mas suave posibel, Duo, den kolaborashon ku otro organisashonnan (gubernamental), na 2025 a desaroyá un hèrmènt speshal ònlain. A traves di rijksoverheid.nl/caribischestudenten studiantenan ta haña un resúmen ku informashon tokante nan derechonan, kua asuntunan nan mester regla i unda nan por haña ayudo. Ademas tin un vershon disponibel na ingles a traves di government.nl/caribbeanstudents.
Tin bon eksperensia ku e hèrmènt. “Nos ta mira ku studiantenan karibense i nan mayornan ta eksperensiá e hèrmènt komo sumamente balioso i ku studiantenan pa e motibu akí ta biaha mihó prepará pa Hulanda”, segun Monique Hoogerwerf, koordinadó pa e área karibense na DUO. “Esei ta aportá na un bon komienso di nan estudio.”
Enkuentro di informashon
Na mart DUO lo tene enkuentro di informashon na Sint Maarten, Aruba, Kòrsou i Boneiru. Durante e enkuentronan akí futuro studiantenan i nan mayornan ta risibí informashon tokante finansiamentu di estudio, e ‘burgerservicenummer’ (BSN) i otro asuntunan práktiko ku mester regla ora ta trata di un estudio na Hulanda.
Ofisina di servisio temporal
DUO lo habri ofisina di servisio temporal tambe na Saba, Sint Eustatius, Sint Maarten, Boneiru i Aruba. Na Kòrsou entrante aprel 2025 ya kaba a habri un ofisina di servisio pa un periodo mas largu.
No solamente studiante, pero tambe eks studiante por akudí aki ku su preguntanan. E por haña mas informashon tokante pago bèk di su debe di estudio, por ehèmpel den valuta lokal kontra gastunan mas abou òf redukshon di e suma mensual. E ofisina di servisio ta pa personanan ku tin problema ku pago òf tin un atraso den pago, pasobra aki nan ta ser yudá di forma personal i por buska solushon adekuado huntu ku un kolaboradó.
Mas informashon tokante e enkuentronan di informashon i e ofisinanan di servisio por wak riba duo.nl/bezoekcariben.